Vilja kynjaskipt verðlaun

Fimleikasambandið vill að vali á íþróttamanni ársins verði breytt og að framvegis verði valin bæði íþróttakona og íþróttakarl ársins. Aðeins fjórum sinnum á 59 árum hefur kona verið valin íþróttamaður ársins.

Íþrótta- og ólympíusamband Íslands og Samtök íþróttafréttamanna halda saman hóf í kringum hver áramót þar sem afreksfólk í íþróttum er heiðrað. Þar er tilkynnt hver íþróttamaður ársins en Samtök íþróttafréttamanna standa fyrir valinu. Íþróttamaður ársins var fyrst verðlaunaður árið 1956. Aðeins fjórum sinnum á þeim 59 árum sem liðin eru síðan þá hefur kona orðið fyrir valinu.

Fimleikasamband Íslands gagnrýnir þetta og segir ómögulegt að trúa því að svo mikill munur sé á íþróttaafrekum kynjanna á þessu tímabili. Ljóst sé að konum sé ekki gert jafn hátt undir höfði og körlum. Sambandið hefur því sent áskorun á ÍSÍ og vill að það beiti sér fyrir því að valinu verði breytt og að framvegis verði valin bæði íþróttakona og íþróttakarl ársins. 

„Konur hafa náð rosalega miklum og góðum árangri en það hefur kannski ekki hlotið hljómgrunn í þessu samfélagi,“ segir Sólveig Jónsdóttir framkvæmdastjóri Fimleikasambands Íslands.

Sólveig segir að í nágrannalöndunum séu víðast hvar valin bæði íþróttakona og íþróttakarl ársins. Það sama eigi við hjá sveitarfélögum hér heima og íþróttasamböndunum sjálfum. Stjórn ÍSÍ ræddi áskorunina á fundi sínum í dag og ætlar í framhaldinu að taka málið upp við stjórn Samtaka íþróttafréttamanna. „Þetta er eitthvað sem að menn ræða sín á milli reglulega,“ segir Eiríkur Stefán Ásgeirsson formaður Samtaka íþróttafréttamanna. Hann segir að í ljósi umræðunnar undanfarið og eftir kjörið hvert ár telji hann tímabært að ræða málið aftur. Hann á von á að það verði gert á næsta aðalfundi samtakanna sem verður haldinn í apríl á næsta ári.

„Kvenréttindabaráttan hefur staðið lengi og núna er merkilegt ár að því leyti til að þetta er 100 ára kosningaafmælið og það er tilvalið þá að íþróttirnar taki þetta skref og stilli sínu vali þannig að það séu allir jafnir,“ segir Sólveig.