Færeyska silfurliðið vill fá Óla Þórðar sem þjálfara

Ólafi Þórðarsyni, fyrrverandi þjálfara Víkings, Fylkis og ÍA, stendur til boða að þjálfa færeyska úrvalsdeildarliðið NSÍ Runavík.

Fótbolti.net hefur greint frá málum NSÍ undanfarnar vikur en liðið var með nokkra íslenska þjálfara á óskalistanum.

Pétur Pétursson hafnaði tilboði NSÍ en einnig komu til greina Guðjón Þórðarson og Atli Eðvaldsson. Þeir hafa nú verið slegnir út af borðinu og stendur valið á milli Ólafs Þórðarsonar eða ónefnds Dana.

„Ég hef verið í smá viðræðum við NSÍ. Þetta er svona bara að þróast. Ég er ekki búinn að segja já. Ég er bara að skoða þetta,“ segir Ólafur í samtali við Vísi.

„Hvað varðar fótboltann finnst mér þetta spennandi. Það er bara ekki einfalt mál að rífa sig svona upp og fara út,“ segir Ólafur sem var óvinnufær vegna brjóskloss í hálsi síðasta vetur og það hrjáir hann enn.

„Ég er í smá basli og var ekkert að vinna síðasta vetur. Ég er enn að glíma við þetta brjóslos. Ef ég væri alveg frískur og í betri aðstöðu væri ég búinn að hoppa á þetta því fótboltalega er þetta spennandi. Veikindin og aðstaðan sem ég er í gerir þetta bara ekki svo einfalt,“ segir Ólafur.

Ólafur segist ætla að taka nokkra daga í viðbótar til að ákveða sig en hann er enn að ræða málin við NSÍ sem hafnaði í öðru sæti færeysku úrvalsdeildarinnar á síðustu leiktíð.

„Þeir eru að bíða eftir svari frá mér. Ef ég afþakka þetta þá taka þeir þennan Dana. Þetta skýrist vonandi fljótlega,“ segir Ólafur Þórðarson.

Ólafur Þórðarson þjálfaði síðast Víking en var látinn fara eftir slæma byrjun liðsins í Pepsi-deildinni á síðustu leiktíð. Hann hafði þó áður komið liðinu upp úr 1. deildinni 2013 og náð fyrsta Evrópusæti liðsins í 23 ár í Pepsi-deildinni 2014. Áður hefur Ólafur þjálfað Fylki og ÍA með góðum árangri en hann gerði Skagamenn að Íslandsmeisturum árið 2001 svo fátt eitt sé nefnt.