Finnur Orri: KR sýndi mér mestan áhuga

Finnur Orri Margeirsson var kynntur til leiks hjá KR í dag en hann skrifaði undir þriggja ára samning við Vesturbæjarliðið.



„Þetta er góð tilfinning og ég er spenntur fyrir næsta sumri,“ sagði Finnur í samtali við Vísi eftir blaðamannafundinn í dag.

Finnur segir að KR hafi sýnt honum mestan áhuga af þeim liðum sem settu sig í samband við hann.

„Þeir sýndu mér mestan áhuga og eftir að hafa rætt við menn hérna er ég sannfærður að þetta sé rétta skrefið fyrir mig,“ sagði Finnur sem lék með Lilleström í norsku úrvalsdeildinni á síðasta tímabili.

Finnur fékk ekki áframhaldandi samning hjá norska liðinu en þrátt fyrir það hefur hann enn áhuga á að spila sem atvinnumaður erlendis.

„Ég væri alveg til í að spila aftur erlendis, ég neita því ekki, en það verður bara að koma í ljós. Ég stefni á að spila með KR næstu þrjú árin nema eitthvað sérstaklega spennandi komi upp.“

Betri leikmaður en fyrir ári

Bjarni Guðjónsson, þjálfari KR, kveðst ánægður að hafa krækt í Finn Orra.

„Hann er hörkuleikmaður þrátt fyrir ungan aldur og á framtíðina fyrir sér. Við reyndum að fá hann fyrir ári síðan en það gekk ekki upp,“ sagði Bjarni en Finnur samdi við FH eftir tímabilið 2014. Hann stoppaði þó stutt við í Hafnarfirðinum og náði ekki að spila keppnisleik með Fimleikafélaginu.

Bjarni segir að Finnur sé betri leikmaður nú en fyrir ári þegar hann fór til Lilleström.

„Hann er betri leikmaður núna en fyrir ári. Hann býr að þessari reynslu úr atvinnumennskunni,“ sagði Bjarni.

„Þetta er karakter, góður leikmaður og með reynslu. Það er kraftur í honum og hann hefur í raun allt sem við leitum eftir í leikmönnum.“