Undirrituðu samninga um móttöku sýrlenskra flóttamanna

Eygló Harðardóttir, félags- og húsnæðismálaráðherra, Ármann Kr. Ólafsson, bæjarstjóri Kópavogsbæjar, Eiríkur Björn Björgvinsson, bæjarstjóri Akureyrarkaupstaðar og Haraldur Líndal Haraldsson bæjarstjóri Hafnarfjarðarkaupstaðar undirrituðu í dag samninga um móttöku 55 sýrlenskra flóttamanna sem væntanlegir eru til landsins nú í desember.

 

Samningarnir eru til tveggja ára en áður hefur verið samið til eins árs vegna móttöku flóttamanna.

Fram kemur í tilkynningu frá velferðarráðuneytinu að hópurinn samanstendur af tíu fjölskyldum. Um er að ræða 20 fullorðna og 35 börn en fólkið dvelur nú allt í í flóttamannabúðum í Líbanon. Af hópnum mun flestir setjast að á Akureyri, eða 23, 17 munu fara í Hafnarfjörð og 15 í Kópavog.

Undirbúningurinn að móttöku fólksins hefur staðið yfir í nokkurn tíma en unnið er í samvinnu við Flóttamannastofnun Sameinuðu þjóðanna.

Þá kemur Rauði krossinn á Íslandi að móttöku flóttafólksins í hverju sveitarfélagi þar sem hann útvegar fólkinu nauðsynlegt innbú á heimili þeirra og hefur jafnframt umsjón með stuðningsfjölskyldum sem ætlað er að liðsinna flóttafólkinu við aðlögun. Velferðarráðuneytið og Rauði krossinn gera með sér samning um framkvæmd þessara verkefna.