Perla komin hálfa leið upp

Dæling úr sanddæluskipinu Perlu, sem hófst síðdegis í dag, hefur gengið vel að sögn Gísla Gíslasonar, hafnarstjóra Faxaflóahafna. Skipið er komið hálfa leið upp og eru vonir bundnar við að því verði komið á flot í kvöld.

„Skipið er komið að hálfu leyti upp úr og lítur þokkalega út. Nú er verið að gæta að því að missa ekki stöðugleika skipsins, en það er á leið upp eins og sakir standa. Við vonum að þetta gangi í þessari atrennu,“ segir Gísli og bætir við að ekki sé ljóst hvort skipinu verði komið á þurrt í kvöld.

Hafrannsóknaskip, nokkrir dráttarbátar og stór prammi eru meðal annars notuð til að ná Perlu upp af botni Reykjavíkurhafnar, en skipið hefur legið þar í tæplega hálfan mánuð. Slökkviliðið á höfuðborgarsvæðinu er jafnframt á staðnum meðal annars til að tryggja að flotgirðing umhverfis skipið haldist á sínum stað.

Uppfært kl. 20.15

„Skipið er í rauninni komið upp og þeir eru bara að dæla betur úr því,“ sagði Jón Þorvaldsson, aðstoðarhafnarstjóri Faxaflóahafna, í samtali við Vísi rétt eftir klukkan átta í kvöld. „Ég á von á því að þessu ljúki bara á næsta klukkutíma eða svo . Annars er skipið orðið nokkuð öruggt.“

Jón segir að klárað verði að dæla úr skipinu og þess gætt að enginn leki sé í því.  Svo verði gengið vel frá bindingum og öðru. Allt verði þetta gert mjög varlega til þess að ekkert komi uppá varðandi stöðugleika skipsins