„Ef þessi hnullungur hefði lent í hausnum á einhverjum þá hefði hann ekkert verið til frásagnar“

Eiður Arnarsson, bassaleikari, sagði á Facebook-síðu sinni frá heldur óskemmtilegu atviki sem hann varð vitni að í vikunni við Rauðarárstíg:

„Lagði bílnum mínum við Rauðarástíg, hinum megin við götuna á móti Gallerí Fold. Gekk yfir götuna og var komin á gangstéttina vestan megin á Rauðarárstígnum þegar kvað við mjög hávær sprenging í húsagrunni austan megin. Horfði því næst á hnefastóran grjóthnullung lenda úr töluverðri hæð ofan á jeppa á miðri götunni, nkl þar sem ég hafði gengið yfir ca 5 sekúndum áður. Bíllinn minn og amk tveir aðrir litu út eins og þeim hefði verið ekið í gegnum blöndu af moldroki og gosmekki.“

Eiður var í viðtali í Bítinu á Bylgjunni í morgun og sagði að augljóslega hefði verið að sprengja fyrir húsgrunni á svæðinu. Hann sagði tilviljun bara hafa ráðið því að enginn slasaðist eða hreinlega dó.

„Ef þessi hnullungur hefði lent í hausnum á einhverjum þá hefði hann ekkert verið til frásagnar,“ sagði Eiður.

 Aðspurður hvort að bílarnir hefðu skemmst mikið sagði hann:

„Ég er ekki viss en bílstjórinn á jeppanum sem fékk hnullunginn ofan á sig hann náttúrulega stoppaði og um leið og byrjaði að öskra og æpa eðlilega. Það sá held ég mjög lítið á honum [bílnum] að vísu sem er ótrúlegt en sennilega til marks um vel smíðaðan bíl. En ef blessaður maðurinn hefði verið á blæjubíl í góðu veðri þá hefði hann ekki getað skoðað eitt eða neitt frekar.“

Drullu og sandi rigndi yfir bíl Eyþórs og sagði hann að það hefði tekið um korter að strjúka mestu drulluna af bílnum. Hann hafi ekki strax áttað sig á hvað atvikið var alvarlegt.

„Ég kveikti ekki almennilega á þessu fyrr en leið á daginn og ákvað að setja þetta á Facebook til að fá einhver viðbrögð því ég hafði heyrt eitthvað þarna á staðnum að þetta hefði líka gerst einum eða tveimur dögum áður. Þá afsakaði verktakinn sig með því að þetta væri bara ryk úr gúmmímottum sem hafð farið þarna yfir en það er ennþá gríðarlega mikið ryk í gúmmímottunum,“ sagði Eiður.

Viðtalið við hann má hlusta á í heild sinni í spilaranum hér að ofan.

Lenti í magnaðri uppákomu í dag. Lagði bílnum mínum við Rauðarástíg, hinum megin við götuna á móti Gallerí Fold. Gekk...

Posted by Eiður Arnarsson on Tuesday, 3 November 2015