Íslenskt efnahagslíf kemst í „allt aðra og eftirsóknarverðari stöðu“ en verið hefur um langt skeið

„Heilt yfir eins og ég tel að muni koma í ljós bæði í þessari kynningu og smám saman eftir því sem tímanum vindur fram að þá erum við með þessum aðgerðum að komast í allt aðra og eftirsóknarverðari stöðu heldur en íslenskt efnahagslíf hefur búið við um langt skeið,“ sagði Bjarni Benediktsson, fjármálaráðherra, á blaðamannafundi í dag þar sem farið var yfir umfang þeirra aðgerða sem ráðist verður í vegna uppgjöra föllnu bankanna.

Bjarni sagði að um væri að ræða stærstu efnahagsgerðir sem ráðist hefur verið í hér á landi en heildaráhrif þeirra eru gríðarleg. Þau væru slík að erfitt væri að finna samlíkingu úr fortíðinni.

Aðgerðirnar fela það í sér að slitabú föllnu bankanna fallast á stöðugleikaskilyrði stjórnvalda, greiða til þeirra svokallað stöðugleikaframlag og fara svo í gegnum nauðasamninga. Alls nema aðgerðirnar 856 milljörðum króna en 500 milljarðar króna renna beint eða óbeint í ríkissjóð.

Seðlabankinn hefur samþykkt að veita slitastjórnum föllnu bankanna undanþágu frá gjaldeyrishöftum og kvaðst Bjarni ætla að styðja þá niðurstöðu. Þegar hann hefði tilkynnt það eftir formlegum leiðum myndi málið fara áfram til slitastjórna sem þyrftu svo að ljúka gerð nauðasamninga og fara fyrir dómstóla.

„Því er ekki að neita að við höfum nokkrar áhyggjur af því á þessari stundu að dómstólarnir verði settir í talsverða tímaþröng til þess að taka til meðhöndlunar og afgreiðslu þessi stærstu slitabú Íslandssögunnar, sem reyndar hvert um sig ef við værum að horfa á gjaldþrot myndi rata á lista yfir 10 stærstu gjaldþrot bandarískrar fyrirtækjasögu. Af þeirri ástæðu er gert ráð fyrir því að það verði viðbótarfrestir þó ekki væri nema til þess að dómstólar fái hæfilegan og sanngjarnan tíma til að vinna sitt verk eftir að slitabúin hafa komist að sinni niðurstöðu.“