Innlent

Forsætisráðherrarnir lærðu að kubba önd með Lego

Heimir Már Pétursson skrifar
Forsætisráðherrar Norðurlandanna, Eystrasaltsríkjanna og Bretlands slógu á létta strengi á Northern Future Forum, eða framtíðarvettvangi Norðursins, í Reykjavík í dag. Þeir lærðu meðal annars að til eru milljónir leiða til að búa til önd úr sex Lego kubbum.

Sigmundur Davíð Gunnlaugsson minntist þess að David Cameron forsætisráðherra Bretlands hafði frumkvæði að þessum vettvangi forsætisraðherranna árið 2011.

„Mig langar að spyrja þann sem við köllum stundum upphafsmann og stundum guðföður sem má e.t.v. ekki nota á formlegum vettvangi... En þar sem þetta er óformlegur vettvangur gætir þú, guðfaði, sagt okkur dálítið frá þessu,“ spurði Sigmundur á léttum nótum.

„Ég hef verið kallaður mörgum nöfnum og „guðfaðir“ er nýtt fyrir mér og það felur í sér ýmsar áhugaverðar aukamerkinga, sérstaklegar þar sem skapandi iðngreinar eru annars vegar. Þakka þér kærlega fyrir góðar móttöku, Sigmundur. Frábært að koma hingað,“ svaraði Cameron og var greinilega skemmt.

En á þessum fundum ræða forsætisráðherrarnir ýmis sameiginleg málefni á mjög óformlegum nótum og án aðstoðarmanna.

„Til að undirstrika það og sýna hve óformleg við erum voru bindin rifin af okkur þegar við gengum í salinn. Svona sýna stjórnmálamenn hvernig þeir eru óformlegir,“ sagði Sigmundur Davíð.

Aðalmálin á dagskrá forsætisráðherranna í Reykjavík voru skapandi greinar og upplýsingatækni á vettvangi hins opinbera.

Forsætisráðherrarnir sátu fundi með um 80 sérfræðingum héðan og þaðan úr heiminum og ræddu betri stjórnsýslu og skapandi greinar. En eftir það svöruðu þeir spurningum fjölmiðla.

Lentu í brasi með að búa til önd

Forstjóri Lego í Danmörku var einn fjölmargra sérfræðinga sem forsætisráðherrarnir hlýddu á, en hann fjallaði um mikilvægi þess að sjá fleiri en eina lausn við úrlausn vandamála.

„Við lærðum líka að búa til önd úr 6 Legó-kubbum. Forsætisráðherra Legó-landsins Danmerkur (Lars Lökke Rasmussen) stóð sig frábærlega við að búa til önd sem og hugvitsfólkið sem var með okkur,“ sagði Sigmundur Davíð.

„Við tveir lentum í basli,“ skaut Cameron þá inní greinilega skemmt.

„Já, það sem við gerðum líktist meira hundi en önd,“ sagði Sigmundur Davíð.

Ráðherrarnir lýstu allir ánægju með fundinn og þá fyrirlestra sem þeir fengu. Það væri mikilvægt að hlusta á fólk í skapandi greinum til að kalla fram nýjungar og hagræðingu í samfélögunum og læra af sigrum og mistökum annarra.


Tengdar fréttir

Mest lesið


Fleiri fréttir

Sjá meira


×

Mest lesið