Veigar tryggði Stjörnunni stig í fyrra | Myndband

Stjarnan og Breiðablik mætast í 17. umferð Pepsi-deildar karla í kvöld.

Leikurinn hefst klukkan 20:00 og verður sýndur í beinni útsendingu á Stöð 2 Sport. Útsendingin hefst hálftíma fyrir leik.

Liðin eru á ólíkum stað í deildinni nú miðað við stöðu þeirra þegar þau mættust í Garðabænum í fyrra, þá einnig í 17. umferð.

Stjarnan var þá í harðri baráttu um Íslandsmeistaratitilinn sem liðið vann svo eftirminnilega í lokaumferðinni. Blikar voru hins vegar í baráttu á hinum enda töflunnar og björguðu sér ekki endanlega frá falli fyrr en undir lok móts.

Ólafur Karl Finsen skoraði eina mark fyrri hálfleiks, úr vítaspyrnu á 44. mínútu, en hann fór meiddur af velli mínútu seinna.

Blikar mættu mjög ákveðnir til leiks í seinni hálfleik og Guðjón Pétur Lýðsson jafnaði metin með frábæru marki beint úr aukaspyrnu á 49. mínútu. Guðjón skoraði alls fjögur mörk beint úr aukaspyrnum í fyrra.

Aðeins þremur mínútum seinna tók Guðjón aukaspyrnu við vítateigshornið vinstra megin, sendi boltann á fjærstöngina á Arnór Svein Aðalsteinsson sem skallaði boltann fyrir markið á Damir Muminovic sem skoraði af stuttu færi.

En eins og svo oft í fyrra komu Stjörnumenn til baka eftir að hafa lent undir og Veigar Páll Gunnarsson jafnaði metin með skalla eftir frábæra fyrir Arnars Más Björgvinssonar á 82. mínútu.

Fleiri urðu mörkin ekki en þremur mínútum fyrir leikslok fékk Martin Rauschenberg, miðvörður Stjörnunnar að líta rauða spjaldið fyrir að brjóta á Árna Vilhjálmssyni sem var sloppinn í gegn.

Þetta var eitt af tólf jafnteflum sem Breiðablik gerði í Pepsi-deildinni 2014 en liðið endaði að lokum í 7. sæti með 27 stig.

Stjarnan varð sem áður sagði Íslandsmeistari í fyrsta sinn í sögu félagsins en liðið fór taplaust í gegnum mótið.

Mörkin og helstu atvik úr leik Stjörnunnar og Breiðabliks í fyrra má sjá í spilaranum hér að ofan.