„Þarf barn í alvörunni að veikjast til að lögreglan taki þetta alvarlega?“

Kattaeigendur í Hveragerði eru ósáttir við lögreglu og rannsókn á dularfullum kattadauðum í Hveragerði nú í ágúst. Ein þeirra segist finna fyrir áhugaleysi og telur að málið sé ekki litið alvarlegum augum.

„Maður fær engin svör og svo hefur lögreglan verið með rangar fullyrðingar í fréttum, aðstoðaryfirlögregluþjónninn sagði á Stöð 2 að lausaganga katta væri bönnuð sem er alls ekki rétt.

Eiginlega eins og hann væri að kenna okkur um að kettirnir okkar væru dauðir. En það er náttúrulega aldrei réttlætanlegt að drepa dýr. Ekki á þennan máta,“ segir Theodora Ponzi en köttur hennar er einn þeirra sem talið er að hafi verið eitrað fyrir.

Sjá einnig: Lögregla rannsakar dularfullu kattadauðana í Hveragerði

Í kvöldfréttum Stöðvar 2 í mánuðinum sagði Þorgrímur Óli Sigurðsson, aðstoðaryfirlögregluþjónn á Suðurlandi, að kettir ættu ekki að vera lausir úti á víðavangi. Hins vegar kemur hvergi fram í samþykktum bæjarins að lausaganga katta sé bönnuð.

„Það fannst fiskur við húsið okkar sem var blár. Það dóu fimm kettir þessa helgi úr nákvæmlega sömu einkennum. Dýralæknir sagði við okkur að einkennin væru í samræmi við frostlögseitrun. Það veiktust hundar og það var svo furðulegt að það hvarf allt fuglalíf í bænum. Það er vanalega mikið af mávum hérna í bænum en það heyrðist ekki fuglasöngur alla helgina.“

Hún telur það fyllilega ljóst að eitrað hafi verið fyrir köttunum þrátt fyrir að lögreglan segist ekkert geta staðfest. Talið er að fisknum bláa hafi verið dýft í frostlög.

Eitraður matur í görðum bæjarbúa

Theodora segir málið grafalvarlegt burtséð frá því hvað fólki finnst almennt um lausagöngu katta.

„Það er verið að setja eitraðan mat í garðana okkar. Þetta er ekkert lítilvægt mál. Ég er með ungabarn og fjögurra ára gutta og þar sem þetta fannst í garðinum okkar þá er maður óöruggur með að hleypa krökkum út að leika. Síðasta fimmtudag var komið fyrir rottueitri í garðinum hjá manninum á móti okkur, hann er með innikött sem fær að fara út í garð.

Hann sá að kötturinn var að borða eitthvað í garðinum og þegar hann kom inn hætti hann að anda, það lak vökvi út úr bringunni og eyrunum á honum sem eru einkenni rottueiturseitrunar. Þessi maður hafði lesið umræðuna sem hefur verið í gangi og náði að gefa kettinum matarsóda og mjólk og gat komið upp á dýraspítala þannig að það náðist að bjarga honum.“

Skelfileg tilhugsun að barn geti veikst

Hún segir það ömurlegt hversu lítil svör hún fái frá lögreglu um gang mála.

„Þarf barn í alvörunni að veikjast til að lögreglan taki þetta alvarlega? Mér finnst það alveg svakaleg tilhugsun sjálfri. Vill fólk hugsa tilbaka eftir að barn hefur veikst og sjá þá að kannski hefðu þeir átt að hlusta?“

Theodora hringdi sjálf upp í Matvælastofnun sem fer með rannsóknina ásamt lögreglu og þar fékk hún þær upplýsingar að aðeins um hálfa teskeið af frostlegi þyrfti til að drepa kött og gera barn alvarlega veikt.