Fer þangað sem fjörið er

Dagur Steinn Elfu Ómarsson rúllaði upp Esjuna í gær í sérútbúnum hjólastól á vegum Öryggismiðstöðarinnar sem ætlar að bjóða fólki í hjólastól að að njóta útsýnisins af Esjunni. Ferðin gekk vonum framar. Svo vel reyndar að Dagur Steinn og aðstoðarmenn hans voru aðeins rúmar tvær klukkustundir upp og niður Esjuna.

Að sögn Dags Steins var útsýnið það besta við að fara á Esjuna en hann er alls ekki óvanur því að fara í ferðalög. hann og fjölskylda hans hafa ferðast vítt og breitt um landið auk þess sem þau hafa ferðast erlendis á íþróttaleiki. Íþróttir eru einmitt helsta áhugamál Dags en hann styður Fjölni á Íslandi og Manchester United í enska boltanum. Hann lætur sig ekki vanta á leiki Fjölnis og fylgdi þeim nýverið til Vestmannaeyja. Dagur Steinn skemmti sér vel í þeirri ferð þó að úrslitin hafi ekki verið eftir óskum en Fjölnismenn töpuðu.

Dagur Steinn hefur jafnframt farið á Old Trafford og horft á liðið sitt Manchester United en í september 2013 fór hann á leik United og Crystal Palace í deildinni og á leik United og Leverkusen í Meistaradeildinni. Dagur fór í ferðina með stuðningi stuðningsmannaklúbbs Manchester United á Íslandi og fékk að hitta Fred the Red, lukkdýr félagsins. Ferðin var algjört ævintýri að sögn Dags Steins en hann var mjög ánægður með hjólastólaaðstöðuna á Old Trafford.

Íþróttir eru helsta áhugamál Dags en þegar Vísir náði tali af honum var hann að vinna upp tveggja vikna skammt af íþróttaleikjum í sjónvarpinu sem hann hafði misst af undanfarnar tvær vikur en hann er nýkominn úr sumarbúðum í Reykjadal.

Dagur Steinn skellti sér einnig á Evrópumótið í handbolta á síðasta ári sem haldið var í Danmörku. Þar hitti Dagur Steinn landsliðsmennina og ræddi við þjálfara og fyrirliða landsliðsins í handbolta þá Aron Kristjánsson og Guðjón Val Sigurðsson í fluginu á leiðinni til Danmerkur.

Dagur Steinn mun taka þátt í Reykjavíkurmaraþoninu eins og undanfarin ár en í þetta sinn ætlar hann að fara í heilt maraþon, 42 kílómetra en hingað til hefur hann tekið þátt í 10 km hlaupi og 21 kílómetra hlaupi. Ætlar hann að keppa til styrktar vini sínum, Steini Jónssyni, sem lenti í mótorhjólaslysi fyrr í sumar.

Um helgina ætlum við að koma 24 einstaklingum upp Esjuna. Þeir eiga það allir sameiginlegt að komast ekki af sjálfsdáðum...

Posted by Öryggismiðstöðin on Tuesday, 11 August 2015