Ólafur Þórðarson látinn fara frá Víkingi | Milos tekur einn við

Ólafur Þórðarson, annar þjálfara Víkings í Pepsi-deild karla í fótbolta, var í dag rekinn úr starfi.

Þetta kemur fram í fréttatilkynningu sem Víkingar sendu frá sér nú rétt í þessu.

Milos Milojevic, sem gerður var að aðalþjálfara Víkings samhliða Ólafi í september í fyrra, verður nú einn aðalþjálfari liðsins. Aðstoaðrmaður verður ráðinn með honum síðar.

Milos gerðist aðstoðarþjálfari hjá Ólafi fyrir sumarið 2013 og saman komu þeir liðinu upp úr 1. deildinni. Víkingur tryggði sér svo Evrópusæti á síðustu leiktíð í Pepsi-deildinni.

Ólafur framlengdi samninginn sinn við Víking um tvö ár í september á síðasta ári og á sama tíma var Milos gerður að aðalþjálfara samhliða Ólafi. Síðan þeir voru gerðir að samþjálfurum hefur Víkingur aðeins unnið tvo leiki af 15 í Pepsi-deildinni.

Milos Milojevic kom til Víkings sem leikmaður frá Hamri 2010 og spilaði lykilhlutverk í liðinu sem komst þá upp úr 1. deildnini. Hann spilaði fimm leiki með Víkingum í Pepsi-deildinni 2011 og tvo leiki í 1. deildinni árið eftir.

Hann hefur sinnt yngri flokka þjálfun hjá Víkingi síðan hann gekk í raðir félagsins og var á tímabili yfirþjálfari yngri flokka hjá félaginu.

Fyrsti leikur Milosar er gríðarlegar mikilvægur botnslagur gegn Keflavík á sunnudagskvöldið. Víkingur mætir Keflavík, ÍA, Leikni og ÍBV í fjórum af næstu sex leikjum liðsins í Pepsi-deildinni.

Eini sigurleikur Víkinga í Pepsi-deildinni á síðustu tíu vikum var leikurinn þar sem Ólafur Þórðarson var í banni og Milos Milojevic stýrði Víkingsliðinu einn. Víkingur vann þá 2-0 sigur á Fjölni.

Fréttatilkynningin í heild sinni:

„Í ljósi árangurs úrvalsdeildarliðs Víkings á yfirstandandi leiktímabili hefur stjórn knattspyrnudeildar félagsins farið þess á leit við Ólaf Þórðarson að hann láti af störfum sem þjálfari liðsins. Hefur Ólafur fallist á þessa beiðni með hagsmuni félagsins að leiðarljósi og úr er samkomulag um að hann láti af störfum frá og með deginum í dag 15. júlí 2015.

 

Ólafur Þórðarson tók við sem þjálfari Víkings í október 2011 og kom liðinu upp í úrvalsdeild árið eftir. Síðastliðið sumar náði Ólafur framúrskarandi árangri með Víkingsliðið þegar hann stýrði liðinu til 4. sætis í úrvalsdeildinni og tryggði þar með félaginu Evrópusæti í fyrsta skipti í 23 ár. Það er því með trega sem sú ákvörðun er tekin að slíta þessu samstarfi.

 

Knattspyrnudeild Víkings þakkar Ólafi fyrir vel unnin störf og óskar honum alls hins besta í framtíðinni.“