Konur nota svefnlyf mun meira en karlar

Íslenskar konur fá ávísað rúmlega 30 þúsund dagskömmtum af svefnlyfjum á hverjar þúsund konur á hverju einasta ári. Langvarandi svefnlyfjanotkun er skaðleg heilsunni að mati lækna.

Fréttablaðið greindi frá því í gær að svefnleysi kvenna væri algengt vandamál sem æ fleiri konur þyrftu hjálp við frá sálfræðingum og geðlæknum. Fram kom að svefnleysið gæti valdið þeim kvíða, depurð og erfiðleikum við að höndla daglegt líf. 

Einnig kom fram að andvökunætur væru heilbrigðiskerfinu dýrar þar sem slysahætta svefnlausra eykst og þeir eru viðkvæmari fyrir sjúkdómum og umgangspestum. 

Magnús Haraldsson, geðlæknir og dósent við Háskóla Íslands, segir að einstaklingar sem nota svefnlyf til langs tíma geti myndað með sér þol fyrir lyfjunum og fíkn í þau.

„Það er einstaklingsbundið hversu hratt það gerist og hversu mikið. Til þess að fá sömu virkni og í upphafi þarf stærri skammta,“ segir Magnús.

Hann segir að öll hefðbundin svefnlyf geti verið ávanabindandi.

Magnús segir jafnframt að rannsóknir bendi til þess að svefngæði minnki við langvarandi notkun svefnlyfja.

Svefnlyfjanotkun Íslendinga er talsvert meiri en annars staðar á Norðurlöndunum. Samkvæmt upplýsingum frá Landlækni notuðu íslenskir karlar ríflega þrjátíu prósentum meira af svefnlyfjum en norskir karlar árið 2014. Á sama tíma notuðu íslenskar konur sautján prósentum meira af svefnlyfjum en norskar konur.

Samkvæmt upplýsingum frá Þórarni Tyrfingssyni, yfirlækni á Vogi, leita 320 til 380 manns til SÁÁ á hverju ári vegna fíknar í svefnlyf og róandi lyf. Um það bil sextíu þeirra hafa ekki fíkn í annað, svo sem áfengi, samhliða fíkn sinni í svefnlyf.