Styrkti 11 ára gamla krabbameinsveika stúlku um tæpar 7 milljónir króna

Bandaríska söngkonan Taylor Swift gaf á dögunum 50.000 bandaríkjadali, eða tæpar 7 milljónir, til styrktar ungum aðdáanda sínum sem berst við krabbamein.

Naomi Oakes er 11 ára gömul og mikill aðdáandi Swift. Fjölskylda hennar setti myndband á YouTube fyrr í þessum mánuði þar sem þau sögðu frá veikindum dóttur sinnar. Þá kom einnig fram að vegna krabbameinsmeðferðarinnar myndi Naomi missa af tónleikum Swift í Phoenix sem hún hafði ætlað að fara á.

Naomi og fjölskylda hennar vonuðust til að fá svar frá Swift þó það væru ekki miklar líkur á því að stjórstjarnan sæi myndbandið.

En Swift sá myndbandið og hún svaraði Naomi:

„Til fallegu og hugrökku Naomi. Mér þykir leitt að þú missir af þeim [tónleikunum] en það verða alltaf aðrir tónleikar. Nú skulum við einbeita okkur að því að þú náir bata. Ég sendi stórt knús til þín og fjölskyldu þinnar.“

Þá gaf Swift tæpar 7 milljónir krónar í styrktarsjóð Naomi sem komið var upp þegar hún veiktist. Fjölskyldan ætlaði upphaflega að safna 4 milljónum.

Hér að neðan má sjá myndband af því þegar Naomi komst að því að átrúnaðargoðið hennar hefði svarað henni.