Hreinkálfur í húsdýragarðinum í fyrsta sinn í sjö ár

Simlan Regína bar myndarlegum hreinkálfi laugardaginn 30. maí en það var í fyrsta skipti í sjö ár sem hreinkálfur lítur dagsins ljós í Fjölskyldu- og húsdýragarðinum. Kálfurinn, sem er simla, braggast vel og fylgir móður sinni hvert fótmál.

Síðasti burður í hreindýrahópi garðsins var þegar móðirin, Regína, kom í heiminn. Faðirinn er tarfurinn Tindur en hann var fluttur í garðinn frá Fljótsdalsheiði fyrir um tveimur árum. Simlur ganga með kálfana í um það bil sjö mánuði og eignast vanalega einn kálf. Talið var að Regína væri geld og kom það því starfsfólki garðsins verulega á óvart þegar í heiminn kom lítill kálfur.

Þá hefur fjölgun orðið í selalaug garðsins en urturnar Esja og Særún hafa báðar kæpt kópum. Þeir komu í heiminn í byrjun júní og eru sprækir. Faðirinn er brimillinn Snorri en hann lætur lítið fyrir sér fara þegar kemur að uppeldinu. Urturnar taka það hlutverk þó mjög alvarlega fyrstu vikurnar.

Myndir af ungviðinu má sjá hér fyrir neðan.