Stjörnuspá Siggu Kling - Krabbi: Taktu eftir hamingjunni

Kraftmikli hugaði krabbinn minn. Þú ert svo ótrúlega heiðarlegur, kraftmikill og skapandi. En þú verður að vita að þú mátt skipta um skoðun og setja kraft inn í nýja atburðarás í lífi þínu.

Eftir því sem líður á sumarið verður mikil spenna í ástarorkunni þinni og krabbinn þarf að passa sig á framhjáhöldum og svoleiðis forboðnum ávöxtum. Þú þarft að ganga hreint til verks, það er annaðhvort já eða nei og það mun frelsa þig frá öllu. Þessi orka er líka í kringum þig í því sem þú ert að gera. Þá máttu ekki vera með loðin svör né leiðandi.

Ekki fjárfesta í neinu nema þú sért tilbúinn að tapa því. Þetta sumar er til þess að taka áhættu í lífinu og þetta verður sumar ferðalaga. Þú átt eftir að rekast á fólk sem þú hefur ekki hitt í fjölmörg ár og ný vináttusambönd hefjast, en önnur hætta.

Það er nefnilega þannig, elskan mín, að þegar allt virðist vera að fara til andskotans þá opnast himnaríki á jörðu. Ef þú skoðar það betur þá er eins og þú sért að breyta um fatastíl. Útlitið á þér er að breytast, þú ert einhvern veginn ánægðari með þig núna en fyrir nokkrum mánuðum. Taktu betur eftir hamingjunni, hún býr heima hjá þér núna.

Mottó:

Það er aldrei of seint að lifa.



Frægir krabbbar: Bryndís Schram fyrirmyndin mín, Sigga Lorange ostabúðarskvísa, Auddi Blö sem við elskum öll, Dagur B. Eggertsson borgarstjóri og dúlla, Ólafur Stefánsson handboltakappi og heimspekingur.