Stjörnuspá Siggu Kling - Vatnsberinn: Uppreisnarseggurinn kemur úr felum

Elsku vitri vatnsberi. Það er mjög algengt að gamlar sálir fæðist inn í þetta merki. Þú hugsar oft öðruvísi, þú ert svo rómantísk. Þú þarft á svo miklum tilfinningum að halda. Þú þarft oft sönnun fyrir öllu, en ég get alveg staðfest að þetta er litríkasta merkið. Þú þarft að kyrra aðeins á huganum, átta þig á hvað er í gangi núna, skoða hraðann sem er á lífi þínu og einfalda hlutina!

Alls ekki bíða eftir því að það sé rétti tíminn til að gera það sem þú ætlar að gera. Kláraðu málin strax, það er mikilvægt. Það gæti hent þig að fá kvíða alveg upp úr þurru og þú þarft að æfa þig í því að koma honum út með því að setja aðra hugsun inn og afvegaleiða hugann í eitthvað annað.

Það er svo gaman hvað þú ert ólíkur öllum og þú elskar fólk, alveg sama hvar það er statt í þjóðfélaginu. Þar af leiðandi leitar fólk til þín með miklar áhyggjur sem þú þarft að leysa. Ég segi því; Það er bara gott fyrir þig að gera það. Það mun efla þig í þeirri framtíð sem bíður þín. Framtíðin er samt núna, staldraðu aðeins við og sjáðu að þetta er búinn að vera frábær tími í svo mörgu og sumarið gefur þér tíma til að slaka á. Eitthvað sem þú ert ekki búinn að vera nógu góð í undanfarið. Venus er að gera sér dælt við vatnsberann, svo ef þú hefur áhuga á að gera hosur þínar grænar fyrir einhverjum, þá skaltu þora það og gera það. Ef þú þorir ekki þá gerist ekkert.

Ástin og vináttan er það sem mun halda lífi þínu í skorðum næstu vikurnar. Þess vegna skaltu ekki láta neitt óþarfa slúður og öfundsýki hafa áhrif á neitt sem þú gerir. Mundu, það er aldrei sparkað í hundshræ, svo hvaða leiðindi sem á vegi þínum verða munu gefa þér aukakraft til að verða betri og hamingjusamari.

Þegar líða tekur á júní birtist skemmtilegur uppreisnarseggur í vatnsberanum. Þú tekur áhættu og þegar þú ert í því þá er eins og þú geislir svo mikið og krafturinn verður rosalegur. Þú átt eftir að afkasta svo miklu meira en þú hefur gert og ég sé að þú horfir á afraksturinn svo fullkomlega sáttur þegar líða tekur á sumarið. Það þarf ekki að biðja guð um að blessa vatnsberann, því hann er í vinnu við það.

Mottó: 

Lausnin er í sjónmáli svo þú þarft ei lengur að bíða.



Frægir vatnsberar: Ragnheiður Guðfinna fegurðardrottning, Pacas hans Begga, Geir Sveinsson, Halla himintungl, Clark Gable, Sveinbjörg Birna Sveinbjörnsdóttir borgarfulltrúi, Yoko Ono.