Kjaftaði varaforseti Real Madrid af sér?

Talið er að Eduardo Fernandez de Blas, varaforseti Real Madrid, hafi misst það út úr sér á fundi með stuðningsmönnum að Rafa Benitez verði næsti þjálfari Real Madrid.

Benitez mun yfirgefa Napoli í lok leiktíðar og hefur verið orðaður við stjórastöðuna hjá Real Madrid frá því að Carlo Ancelotti var rekinn frá félaginu.

"Ancelotti er alveg frábær og við þökkum honum kærlega fyrir. Þar til fyrir þremur vikum var hann besti þjálfari í heimi, fyrir tveimur árum var það Jose Mourinho og frá og með þessari viku verður það Rafa Benitez," sagði Blas en þessi orð hans þykja benda til að Real Madrid sé búið að semja við Benitez um að taka við liðinu.