Sam­þykkja undir­skrifta­söfnun vegna kísil­vers Thorsil

Bæjarráð Reykjanesbæjar hefur samþykkt að láta framkvæma undirskriftarsöfnun meðal bæjarbúa vegna byggingar kísilvers Thorsils í Helguvík. Íbúar hafa einnig krafist þess að haldin verði bindandi kosning um máliði. Bæjaryfirvöld segja að ekki verið fallið frá þeim samningum við Thorsil sem búið er að undirrita.

Forsvarsmenn hópsins benda á verið verði í aðeins um eins kílómetra fjarlægð frá svæði hestamannafélagsins Mána og í um 1,4 kílómetra fjarlægð frá íbúabyggð. Íbúarnir óttast mengun vegna veranna.

„Fundargerð bæjarráðs fer svo fyrir bæjarstjórn í næstu viku og verður væntanlega samþykkt þar og þar með er komin heimild frá bæjaryfirvöldum til þessara aðila til að hefja undirskriftasöfnun,“ segir Kjartan Már Kjartansson, bæjarstjóri í Reykjanesbæ. 

„Það þarf að nást samkomulag um fyrirsögn hennar og um hvað hún á að snúast, hvað fólk er að skrifa undir og svo framvegis þannig að það eru nokkur handtök eftir þar til hún fer í gang,“ segir hann.

25 prósent kosningabærra íbúa, milli 2500 til 3000 manns þurfa að skrifa undir svo halda megi íbúakosningu. Bæjarráð hafnaði þó að íbúakosning yrði bindandi kæmi að henni. Kjartan segir að nú þegar sé búið að klára samninga við Thorsil en segir að bæjarstjórn hafi síðasta orðið.

„Kjörnir fulltrúar og bæjarstjórn á eftir að fjalla um það. Fyrst er bara að undirbúa þessa undirskriftasöfnun með þeim og hleypa henni af stað. Þeir munu fá fjórar vikur til að safna undirskriftum,“ segir hann. „Takist það að safna nægilega mörgum þá verða næstu skref rædd og ákveðin í samráði við þá.“

Kjartan segir engar samningaviðræður í gangi á milli bæjarins og Thorsil. „Það er búið að ganga frá öllum samningum við þá og það var gert í fyrra. Þannig að við erum bara að uppfylla ákvæði þeirra samninga,“ segir hann.

Þannig að það er í sjálfu sér of seint að hætta við þessa framkvæmd? „Já.“

Bæjarráð segir í fundargerð sinni að Reykjanesbær muni standa við gerða samninga vegna kísilvers Thorsils. Þá benda fulltrúar Sjálfstæðisflokks, Árni Sigfússon og Böðvar Jónsson, í bókun bæjarráðs að afturköllun samninga sem bæjarstjórn hefur þegar samþykkt myndi án vafa leiða til skaðabótaskyldu fyrir bæjarsjóð.

Ekki náðist í talsmenn íbúanna sem gagnrýna uppbyggingu kísilversins við vinnslu fréttarinnar.