Listamaðurinn íhugar að óska eftir vernd vegna hótana frá Íslendingum

Síleski listamaðurinn Marco Evaristti, sem búsettur er í Danmörku, íhugar að óska eftir lögregluvernd þegar hann kemur hingað til lands vegna fjölda líflátshótana sem honum hafa borist undanfarna daga. Hann er sakaður um brot á náttúruverndarlögum en hyggst fara með mál sitt fyrir dómstóla á næstu vikum.

Evaristti hellti á dögunum rauðu litarefni út í hverinn Strokk á Geysissvæðinu í Haukadal og vakti uppátækið mikið hneykslan hér á landi. Hann segist þó hafa vonast til þess því markmið hans hafi verið að vekja athygli á náttúrunni. Nú sjái hann að fólki sé ekki sama. Hann segir litarefnið þó með öllu skaðlaust og harmar því hversu reiðir Íslendingar hafi orðið.

Hótanirnar aldrei orðið eins persónulegar

„Ég verð að segja að ég er í miklu uppnámi yfir þessu. Ég er búin að fá svona 12-15 alvarlegar hótanir frá því að fyrstu fréttir um málið birtust. Það var hins vegar alveg vitað að þetta myndi vekja umtal, það gerir það alltaf en fólk hefur alltaf róað sig eftir að það fær að vita hvers vegna þetta var gert. Svo virðist ekki vera í þessu tilfelli,“ sagði hann í samtali við Vísi.

Hann segist aldrei upplifað jafn mikla reiði á öllum sínum listamannaferli. „Það hafa alvarleg mál komið upp. Tvívegis hafa borist sprengjuhótanir en ég hef aldrei fengið svona persónulegar hótanir. Einungis gagnvart listinni sjálfri.“

Hótanirnar eru að hans sögn verulega grófar, honum er hótað lífláti og nauðgun og lýsingarnar ítarlegar. Þær fær hann sendar í einkaskilaboðum á Facebook, en einnig hafa afar hörð ummæli verið látin falla á opinni síðu hans. „Einn segir til dæmis að ef ég læt sjá mig á Íslandi þá verði andlit mitt málað með blóði,“ segir hann. Því votti fyrir dálítilli hræðslu.

„Þetta er einfaldlega að verða of mikið,“ bætir hann við.

Gullfiskar í matvinnsluvél og mennsk fita

Marco Evaristti hefur margoft hneykslað fólk með list sinni. Hann vakti gríðarlega reiði í Danmörku árið 2000 þegar hann setti gullfiska ofan í nokkrar matvinnsluvélar fullar af vatni. Gestum og gangandi var svo gefinn kostur á að setja matvinnsluvélarnar í gang.

Þá urðu umhverfissinnar í Grænlandi æfir þegar hann málaði ísjaka rauðan árið 2004. Árið 2007 bauð hann svo fólk í „listrænan kvöldverð“ þar sem í boði var pasta og kjötbollur, sem meðal annars voru búnar til úr fitu úr honum sjálfum.

Myndskeið af uppátæki hans hér á landi má sjá í spilaranum hér fyrir neðan.