Innlent

Hvassahraun skoðað undir alþjóðaflugvöll

Kristján Már Unnarsson skrifar

Nýr flugvöllur í Hvassahrauni, sem myndi þjóna bæði millilanda- og innanlandsflugi, er nú til ítarlegrar skoðunar á vegum Rögnunefndar. Verið er að kanna hvort þetta sé hagstæðari kostur heldur en að leggja í miklar fjárfestingar í hraðlest og stækkun Keflavíkurflugvallar. Þessi lausn gæti jafnframt höggvið á hnútinn í Vatnsmýri.

Hvassahraun er skammt frá Hafnarfirði. Grafík/Tótla.

Hvassahraun í útjaðri Hafnarfjarðar hefur af og til verið nefnt undir innanlandsflugvöll en mætt þeim mótrökum að það tæki því ekki að gera nýjan flugvöll svo nálægt Keflavík. Innan Rögnunefndar er nú horft á Hvassahraun í nýju ljósi, meðal annars vegna áforma, sem Isavia kynnti nýlega, um tugmilljarða króna framkvæmdir á Keflavíkurflugvelli með stækkun flugstöðvar, endurnýjun flugbrauta og nýrri flugbraut.

Spurningarnar sem menn vilja fá svarað eru mjög áhugaverðar, eins og þessar: Getur verið að kostnaður við nýjan alþjóðaflugvöll í Hvassahrauni sé jafnvel minni heldur en við hraðlest til Keflavíkur? Og ennfremur: Getur verið að sá kostnaður sem Isavia áformar að leggja í þróun Keflavíkurflugvallar á næsta aldarfjórðungi slagi jafnvel upp í nýjan flugvöll?

Áætlanir eru um að verja tugum milljarða króna til framkvæmda á Keflavíkurflugvelli næsta aldarfjórðung. Er þeim fjármunum betur varið í nýjan alþjóðaflugvöll nær Reykjavík? Grafík/Isavia.

Og hví ekki að slá tvær flugur í einu höggi, höggva á hnútinn í Vatnsmýri og fá um leið millilandaflugvöll mun nær mesta þéttbýli landsins, aðeins sex til átta kílómetra frá útjaðri byggðar í Hafnarfirði. Mislæg gatnamót eru til staðar á Reykjanesbraut út í Hvassahraun en þar sýna skiltin 26 kílómetra vegalengd að Leifsstöð og 22 kílómetra inn í miðborg Reykjavíkur.

Horft úr Hvassahrauni til byggðarinnar á Reykjavíkursvæðinu. Stöð 2/Sigurjón Ólason.

Menn sjá fyrir sér flugvöll sem gæti byrjað sem innanlandsvöllur með hluta af millilandaflugi en myndi síðan þróast upp í að verða stærri. Hluti flugs til Norðurlanda og Bretlands færi jafnvel strax á nýjan völlinn til að létta álagi af Keflavíkurflugvelli. Hvassahraunsvöllur myndi síðan þróast upp í að verða aðalflugvöllur landsins. 

Rögnunefnd er meðal annars að láta gera ítarlegt mat á veðurfari, eins og sviptivindum frá Reykjanesfjallagarði, og jarðfræði Hvassahrauns og hættu á eldvirkni. Fyrstu niðurstöður veðurfarsrannsókna liggja fyrir og benda til að þetta sé ekki slæmur kostur, samkvæmt upplýsingum fréttastofu. 

Formaður nefndarinnar, Ragna Árnadóttir, vill ekki tjá sig um starf nefndarinnar að öðru leyti en því að Hvassahraun sé einn af fimm flugvallarkostum til skoðunar. Hinir séu Bessastaðanes, Löngusker, Hólmsheiði og breyttar útfærslur flugvallar í Vatnsmýri. Nefndin hefur frest til 1. júní til að skila niðurstöðum.

Hvassahraun er í lögsögu Hafnarfjarðar og sveitarfélagsins Voga. Veðurfarsrannsókn beinist nú að sviptivindum frá Reykjanesfjallgarði. Stöð 2/Sigurjón Ólason.

Tengdar fréttir

Ekki hægt að hliðra til Hlíðarendabyggð

Brynjar Harðarson, framkvæmdastjóri Valsmanna hf., segir ekki unnt að hliðra til Hlíðarendabyggð til að koma í veg fyrir að minnstu flugbraut Reykjavíkurflugvallar verði lokað.

Ríkisvaldið bregðist við kverkataki borgarinnar

"Það verður að stöðva þessa óheillaþróun, sem lokun flugvallarins mun hafa í för með sér, áður en það verður of seint. Af framkvæmdum Valsmanna mun hljótast ómældur og óbætanlegur skaði,“ segir í bréfi sem samtökin Hjartað í Vatnsmýri sendu alþingismönnum og innanríkisráðherra í dag.

Heiftúðugar deilur fari í sáttafarveg

Katrín Júlíusdóttir, þingmaður Samfylkingarinnar, segir deilurnar um Reykjavíkurflugvöll orðnar svo heiftúðugar að þær verði að setja í sáttafarveg.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.