Ríkisvaldið bregðist við kverkataki borgarinnar

„Það verður að stöðva þessa óheillaþróun, sem lokun flugvallarins mun hafa í för með sér, áður en það verður of seint.  Af framkvæmdum Valsmanna mun hljótast ómældur og óbætanlegur skaði,“ segir í bréfi sem samtökin Hjartað í Vatnsmýri sendu alþingismönnum og innanríkisráðherra í dag í tilefni þess að á næstu dögum hefjast framkvæmdir á Hlíðarenda sem leiða munu til lokunar einnar af flugbrautum Reykjavíkurflugvallar.

Í bréfinu er hvatt til þess að brugðist verði „..við því kverkataki, sem borgin virðist hafa tekið ríkisvaldið í þessu máli.  Það er vitanlega verkefni Alþingis og ríkisstjórnar að finna leið út úr þessum vanda sem virðist stafa af því að sveitarfélag telur sig geta boðið almannahagsmunum birginn í krafti skipulagsheimildar þess,“ segir í bréfinu.  Ennþá sé tími til að koma í veg fyrir þennan ljóta leik.

Bréfið er í heild sinni svohljóðandi:

„Ágætu Alþingismenn og innanríkisráðherra. 

Efni: Reykjavíkurflugvöllur. 



Hjartað í Vatnsmýri vekur athygli ykkar allra á því, að á næstu dögum er áformað að Valsmenn hefji framkvæmdir við norðurenda NA/SV brautar Reykjavíkurflugvallar, svokallaðrar neyðarbrautar.   Sú framkvæmd, sem er dyggilega studd af meirihluta borgarstjórnar Reykjavíkur er fyrsta skrefið að lokun Reykjavíkurflugvallar. Allt tal um að þetta sé einungis framkvæmdavegur og þess háttar er einungis til að reyna að slá ryki í augu fólks.  Reykjavíkurborg er fullkunnugt um, að lokun þessarar brautar er reiðarslag fyrir flugöryggi Reykjavíkurflugvallar, en meirihlutinn lætur það sig engu varða, þar sem byggingarhagsmunir Valsmanna virðast skipta þá meira máli.

73% Reykvíkinga vilja hafa Reykjavíkurflugvöll þar sem hann er, 82% landsmanna vilja hafa Reykjavíkurflugvöll þar sem hann er.  Meirihluta borgarstjórnar Reykjavíkur er fullljóst að þeir fara gegn þessum mikla meirihluta landsmanna og Reykvíkinga þegar þeir heimila Valsmönnum að hefja framkvæmdir við að loka Reykjavíkurflugvelli.  Reykjavík hefur að minnsta kosti til skamms tíma verið álitin höfuðborg allra landsmanna.  Um 70.000 eða 28% kosningabærra Íslendinga skrifuðu undir áskorun til Reykjavíkurborgar og Alþingis um að hafa völlinn á sínum stað. Það virðist engin áhrif hafa á Reykjavíkurborg.

Grasrótarsamtökin Hjartað í Vatnsmýri hafa gert allt sem þeim er unnt til að hafa áhrif á ákvarðanir í þessu efni.  Hver einasti aðili, sem kemur að flugmálum á Íslandi með einhverjum hætti virðist sama sinnis og mikill meirihluti landsmanna, en allt kemur fyrir ekki.  Reykjavíkurborg beitir skipulagi borgarinnar fyrir sig og þurrkar flugvöllinn út af skipulagi borgarinnar og heldur ótrauð áfram að þessari niðurrifsstarfsemi með dyggum stuðningi byggingarhagsmuna Valsmanna.

Með því að loka Reykjavíkurflugvelli og jafnvel aðeins þessari einu braut til að byrja með er stórlega vegið að flugöryggi í landinu.  Það liggur jafnframt fyrir, að varavöllur verður að vera á suðvestur horni landsins.  Kostnaður við að byggja nýjan flugvöll er gríðarlegur og sá kostnaður fellur á ríkissjóð og landsmenn alla, en ekki bara Reykvíkinga.

Allt þetta mál er sorglegt dæmi um þrönga sérhagsmuni á kostnað mikils meirihluta landsmanna.  Allt hefur verið gert sem mögulegt er til að hafa áhrif á þessi byggingaráform, sem leiða til þessa óbætanlega tjóns sem í uppsiglingu er.

Hjartað í Vatnsmýri, telur einsýnt að einungis Alþingi og ríkisstjórn geti stöðvað þessar framkvæmdir.

Bæði Valsmenn og Reykjavíkurborg hafa haft uppi orð um miklar skaðabætur sem kynnu að falla á þann sem stöðvaði þessar framkvæmdir.  Við drögum mjög í efa að skaðabótaréttur Valsmanna sé svo ótvíræður sem þeir vilja vera láta.  Hvort tveggja er, að ennþá er kostnaður þeirra einvörðungu vegna skipulags- og hönnunarvinnu og auk þess hafa þeir ekki verið í góðri trú við þá vinnu um langt skeið vegna þess að þeim hefur verið kunnugt um að miklar deilur stæðu um framkvæmdina og hafa reitt sig einvörðungu á yfirlýsingar borgarinnar.  Hins vegar er jafnframt ljóst, að kæmi til einhverra skaðabótagreiðslna vegna þess að Valsmenn þyrftu að haga byggingarframkvæmdum sínum þannig að flugvöllurinn gæti verið áfram, þá yrðu þær bætur aldrei nema lítið brot af þeim kostnaði sem af því hlýst að þurfa að byggja nýjan flugvöll.

Ágætu Alþingismenn og innanríkisráðherra.

Við sem grasrótarsamtök teljum okkur skylt að koma þessu á framfæri við hið háa Alþingi og gerum það með því að senda bréf til allra Alþingismanna og innanríkisráðherra.

Það hafa komið fram ýmsar hugmyndir um það, hvernig eigi að bregðast við því kverkataki, sem borgin virðist hafa tekið ríkisvaldið í þessu máli.  Það er vitanlega verkefni Alþingis og ríkisstjórnar að finna leið út úr þessum vanda sem virðist stafa af því að sveitarfélag telur sig geta boðið almannahagsmunum birginn í krafti skipulagsheimildar þess.  Samt er það ríkisvaldið sem fer með endanlegt skipulagsvald.  Dæmi eru um það erlendis, að skipulag tiltekinna svæða eða mannvirkja sé fært beint undir skipulagsvald ríkisins vegna öryggishagsmuna.  Sama á jafnframt við hér á landi um Keflavíkurflugvöll.  Með vísan til þeirrar óheillaþróunar sem átt hefur sér stað varðandi skipulag Reykjavíkurflugvallar hlýtur að vera athugandi að færa skipulag Reykjavíkurflugvallar og eftir atvikum annarra mannvirkja og/eða svæða beint undir skipulagsvald ríkisins.

Þetta er langstærsta mál sinnar tegundar sem upp hefur komið hér á landi. Það verður að stöðva þessa óheillaþróun, sem lokun flugvallarins mun hafa í för með sér, áður en það verður of seint.  Af framkvæmdum Valsmanna mun hljótast ómældur og óbætanlegur skaði.  Þar vegast á peningalegir hagsmunir þeirra og öryggishagsmunir þjóðarinnar.  Það er ennþá tími til að koma í veg fyrir þennan ljóta leik.

Með vinsemd og virðingu.

Formenn Hjartans í Vatnsmýri.

Friðrik Pálsson.

Njáll Trausti Friðbertsson."