Verkfalli tæknimanna RÚV afstýrt

Samningar hafa náðst á milli RÚV og tæknimanna hjá fyrirtækinu sem eru félagar í Rafiðnaðarsambandi Íslands. Stjórnendur RÚV og fulltrúar tæknimanna skrifuðu undir nýjan fyrirtækjasamning á fundi ríkissáttasemjara um klukkan hálf fjögur í dag.

Viðræður höfðu staðið yfir í nokkurn tíma og boðað hafði verið til verkfalls sem hefjast átti í fyrramálið. Verkfallið hefði haft víðtæk áhrif enda nýtir þorri þjóðarinnar sér þjónustu Ríkisútvarpsins í sjónvarpi, útvarpi og á internetinu.

Með undirrituninni er fallið frá verkfalli en félagsmenn munu greiða atkvæði um samninginn nú síðdegis.