Nemendur lýsa yfir þungum áhyggjum

Sviðsráð Heilbrigðisvísindasviðs Stúdentaráðs og nemendafélög heilbrigðisgreina við Háskóla Íslands lýsa yfir þungum áhyggjum vegna verkfalls heilbrigðisstarfsmanna á heilbrigðisstofnunum víða um lands. Þegar hafa um 533 starfsmenn lagt niður störf. 

Í tilkynningu frá sviðsráði og nemendafélögunum segir að verkfallið muni óumflýjanlega hafa áhrif á verklega kennslu nemenda við Heilbrigðisvísindasvið. Megi þar meðal annars nefna þátttöku í aðgerðum, prófaundirbúningi og dýrmæta reynslu sem aðeins verði fengin undir handleiðslu menntaðra heilbrigðisstarfsmanna sem muni falla niður við verkföll þeirra. Ekki bæti úr skák álag á sjúkrastofnunum þar sem enn sé unnið að því að vinna úr biðlistum eftir læknaverkfallið og inflúensufaraldurinn sem í vetur olli því að nýting sjúkrahúsrýma fór yfir hundrað prósent.

Sviðráð lýsir þó eftir stuðningi við verkfallsaðgerðir heilbrigðisstarfsfólks í Bandalagi háskólamanna því ótækt sé að háskólamenntaðir starfsmenn fái ekki greidd laun í samræmi við menntun og reynslu. „Enn fremur hvetur Sviðsráð stjórnvöld til að bregðast við, sjúkrastofnanir landsins mega ekki við auknu álagi og frestun aðgerða hefur áhrif bæði á þjónustu og menntun framtíðarstarfsfólks heilbrigðiskerfisins,“ segir í tilkynningunni.