Átelja borgina í flugvallarmáli og hvetja ráðherra til að beita sér

Samtök ferðaþjónustunnar átelja borgaryfirvöld fyrir að ætla einhliða að leggja niður minnstu flugbraut Reykjavíkurflugvallar. Forystumenn ferðaþjónustunnar hvetja innanríkisráðherra til að grípa í taumana.

Í dag voru dæmigerðar aðstæður í Reykjavík sem kölluðu á notkun hinnar umdeildu flugbrautar; suðvestanátt með svo hvössum vindhviðum inn á milli að ólendandi varð á öðrum brautum, og nýttist hún til milli fimm og tíu lendinga og flugtaka í innanlandsfluginu í dag.

Málið brennur á Samtökum ferðaþjónustunnar sem funduðu með Ólöfu Nordal innanríkisráðherra í gær og afhentu henni bréf þar sem vinnubrögð borgarinnar í flugbrautarmálinu eru átalin.

Samtök ferðaþjónustunnar segja í bréfinu það mjög alvarlegt hvernig niðurstaða borgarinnar var fengin. Allar umsagnir vegna breytingar á deiliskipulagi Hlíðarenda hafi verið afgreiddar með sama hætti, það er að „flugbraut 06/24 er ekki lengur að finna á skipulagi“. 

„Að hafna allri efnislegri umræðu um umsagnir eru ámælisverð vinnubrögð.." segir í bréfinu. Og ennfremur:  „Niðurstaðan þýðir að Reykjavíkurborg er einhliða að taka ákvörðun um að skerða flugöryggi og taka enn eitt skref í að leggja flugvöllinn niður.  Draga má í efa heimild Reykjavíkurborgar til að  taka svo afdrifaríka ákvörðun um eitt mikilvægasta samgöngumannvirki landsins," segja Samtök ferðaþjónustunnar.

Helga Árnadóttir, framkvæmdastjóri Samtaka ferðaþjónustunnar, segir í samtali við Stöð 2 að það gangi engan veginn að sú flugbraut fari vegna öryggishlutverks hennar þar til fyrir liggur hvar braut með sömu stefnu verði staðsett.

Samtök ferðaþjónustunnar fóru fram á það við innanríkisráðherra í gær að hann tæki málefni flugbrautarinnar upp við borgaryfirvöld og kannaði hvort borgin hefði heimild til að taka jafn afdrífaríka ákvörðun. 

„Við teljum bara mjög mikla ástæðu til þess að það sé gripið í taumana þannig að bæði stjórnvöld og borgaryfirvöld komi sér saman um áframhaldandi veru Reykjavíkurflugvallar í Vatnsmýrinni, að minnsta kosti þar til önnur lausn liggur fyrir,-  og það á við hvort sem er flugvöllinn sem slíkan og svokallaða neyðarbraut,“ segir Helga Árnadóttir.

Bréf Samtaka ferðaþjónustunnar til innanríkisráðherra í gær er í heild svohljóðandi: 

„Niðurstaða Umhverfis-og skipulagsráðs Reykjavíkur sem birtist í bréfi frá Reykjavíkurborg dags. 08.12.2014, þar sem umsagnir sem varða breytingu á deiliskipulagi Hlíðarenda eru allar afgreiddar með sama hætti þ.e. að „flugbraut 06/24 er ekki lengur að finna á skipulagi, er mjög alvarleg.  Að hafna allri efnislegri umræðu um umsagnir eru ámælisverð vinnubrögð og niðurstaðan þýðir að Reykjavíkurborg er einhliða að taka ákvörðun um að skerða flugöryggi og taka enn eitt skref í að leggja flugvöllinn niður.  Draga má í efa heimild Reykjavíkurborgar til að  taka svo afdrifaríka ákvörðun um eitt mikilvægasta samgöngumannvirki landsins. 

Samtök ferðaþjónustunnar telja að stjórnsýslulegt ferli málsmeðferðar Reykjavíkurflugvallar innan borgarkerfisins sé ámælisvert, því til stuðnings má nefna að deiliskipulag sem vísað er í af hálfu Umhverfis-og skipulagsráðs hefur verið kært til úrskurðanefndar umhverfis-og auðlindamála og draga má í efa heimild Reykjavíkurborgar til að taka svo afdrifaríka ákvörðun um flugvöll þar sem uppfylla þarf kröfur í lögum og reglugerðum til að fá og halda starfsleyfi. 

Nauðsynlegt er að minna á að í allri umræðu um lokun flugbrautar 06/24  hefur af hálfu Innanríkisráðuneytis (áður Samgönguráðuneytis) og flugmálayfirvalda alltaf verið gengið út frá að til slíkrar lokunar komi ekki nema lausn finnist á því flugöryggishlutverki sem flugbraut 06/24 gegnir á Reykjavíkurflugvelli. Flugbraut með legu SV/NA  á suðvesturhorni landsins er nauðsynleg fyrir innanlandsflug og bætir öryggi millilandaflugs þar sem á vetrum fer gjarnan saman suðvestan éljagangur og hálka. 

Samtök ferðaþjónustunnar fara því fram á það við Innanríkisráðherra að taka málefni flugbrautar 06/24 á Reykjavíkurflugvelli upp við Reykjavíkurborg í þeim tilgangi að tryggja flugöryggi á flugvellinum og jafnframt verði kannað innan ráðuneytisins hvort Reykjavíkurborg hafi heimild til að taka jafn afdrifaríka ákvörðun um þetta mikilvæga samgöngumannvirki og raun ber vitni um.“ 

Jafnframt fylgdi með svohljóðandi ályktun síðasta aðalfundar SAF: 

„Aðalfundur SAF haldinn 10. apríl 2014 skorar á forsvarsmenn Reykjavíkurborgar að láta af andstöðu sinni við Reykjavíkurflugvöll í Vatnsmýrinni. 

Það er í beinni andstöðu við þá sátt sem verið hefur í þjóðfélaginu um Reykjavík sem höfuðborg landsmanna allra að vinna markvisst að því að þrengja svo að einu mikilvægasta samgöngumannvirki landsins að það geti ekki sinnt hlutverki sínu, hvorki til almannasamgangna né til sjúkraflugs. 

Fundurinn skorar jafnframt á Alþingi og ríkisstjórn Íslands að tryggja með öllum tiltækum ráðum að farið verði að vilja þeirra 70.000 kosningabærra manna, sem skrifuðu undir áskorun um áframhaldandi veru vallarins í Vatnsmýri og endurtekinna skoðanakannana sem sýna yfirgnæfandi stuðning landsmanna við völlinn, þar á meðal 73% Reykvíkinga.”