Endurlífgun tókst eftir tæpa tvo tíma: Íslenskur læknir segir kuldann hafa mikið að segja

22 mánaða gamall drengur, Gardell Martin, sem féll niður um vök í Pennsylvaníu og fór í hjartastopp var lífgaður við af læknum en hjartað komst aftur í gang eftir 101 mínútu. Það þykir ganga kraftaverki næst að drengurinn hafi lifað af og var rætt við Felix Valsson, formann Endurlífgunarráðs og lækni, í Reykjavík síðdegis í gær um málið.

„Þetta er mjög langur tími sem drengurinn er í hjartastoppi en það gleðilega í þessu er að hann virðist koma alveg heill út úr þessu. Maður er auðvitað alltaf mest hræddur um að það verði mikill heilaskaði þegar fólk fer lengi í hjartastopp en hann kemur alveg heill út úr þessu sem er bara alveg stórkostlegt,“ segir Felix.

Hann segir að kuldinn hafi mikil áhrif á það og segir fjölmörg dæmi um það að hægt sé að halda endurlífgun áfram ansi lengi hjá sjúklingum sem kólna hratt niður. Felix nefnir dæmi um sænskan lækni sem féll niður undir ísbreiðu yfir á en líkamshiti hans mældist 13,9 gráður. Endurlífgun tók þá klukkutíma en læknirinn hafði verið undir ísbreiðunni í klukkutíma þegar endurlífgun hófst.

„Þegar mikil ofkæling eru öll ytri merki þess að manneskjan sé látin, eins og var tilfellið með lækninn í Svíþjóð. Hún var bara með beina línu á hjartalínuriti og ljósopin stíf. Allt benti því til þess að það væri ekkert lífsmark hjá henni. En þá hefur kuldinn þau áhrif að hann hægir á öllum efnaskiptum í líkamanum svo ef maður nær að hita sjúklinginn upp hægt og rólega og koma blóðrásinni af stað að þá nær maður að bjarga heilanum.“

Felix segir mikilvægt að fólk kunni að beita góðu hjartahnoði alveg frá byrjun og það hafi skipt miklu máli í tilfelli litla drengsins í Pennsylvaníu að hjartahnoð hófst um leið og honum var bjargað upp úr vökinni.

Hlusta má á viðtalið við Felix í heild sinni í spilaranum hér að neðan.