Leifur Breiðfjörð fær milljónirnar endurgreiddar frá ríkinu

Íslenska ríkið þarf að endurgreiða listamanninum Leifi Breiðfjörð rúmar sjö milljónir króna auk dráttarvaxta aftur í tímann. Hæstiréttur staðfesti dóm Héraðsdóms Reykjavíkur frá því í apríl í fyrra í máli Leifs gegn ríkinu.

Málið höfðaði Leifur vegna virðisaukaskatts sem hann þurfti að reiða fram, 7,4 milljónir króna árið 2010, þegar listaverk hans, tvær hurðir fyrir Hallgrímskirkju, var flutt til landsins.

Forsaga málsins er sú að fyrir 25 árum hóf söfnuður Hallgrímskirkju að afla fjár fyrir kaupum á listaverki sem nota átti meðal annars sem hurð í kirkjunni. Leifur var fenginn til verksins. Hurðirnar, sem eru smíðaðar í Þýskalandi, vega hvor um sig um 800 kíló og þurfti krana til að koma þeim fyrir á sínum stað.

Vildi upplýsingar um hurðir í Seðlabankanum og Fossvogskirkju

Leifur flutti hurðirnar til landsins í eigin nafni frá Þýskalandi í ársbyrjun 2010. Tollstjóri neitaði hins vegar að flokka þær sem listaverk og setti þær í flokk smíðavara. Þurfti Leifur því persónulega að greiða virðisaukaskatt og vörugjöld af hurðunum.

Leifur stefndi ríkinu og kafðist endurgreiðslu á tollagjöldum. Í rökstuðningi sínum fyrir dómi óskaði Leifur eftir því að ríkið tilgreindi hvort hurðirnar á Seðlabankanum og Fossvogskirkju hefðu verið tollaðar sem listaverk á sínum tíma. Lögmaður ríkisins neitaði hins vegar að gefa þær upplýsingar upp.

„Þetta er afar ánægjulegt. Þetta er stór sigur fyrir íslenska myndlist og þá sérstaklega myndlistarmenn," sagði Leifur Breiðfjörð þegar dómur var kveðinn upp í héraði fyrir tæpu ári og er vafalítið enn sama sinnis.

Listaverk úr bronsi

„Ágreiningslaust er að listaverk það, sem hér um ræðir, sé frumverk af skúlptúr sem stefndi vann að hjá viðurkenndri listasmiðju í Þýskalandi, sem sérhæfir sig í að veita þjónustu vegna brons höggmynda,“ segir í dómi Hæstaréttar.

Í flutningsskírteini EUR 1, sem fyrir liggi í málinu og gefið var út af þýskum tollyfirvöldum, komi fram að um sé að ræða listaverk úr bronsi, einstakt fyrir Hallgrímskirkju.

Þá segir að listaverk Leifs falli réttilega undir tollskrárnúmer sem fullyrði skilyrðum um að það sé undanskilið virðisaukaskatti. Var dómur í héraði því staðfestur.

Dóm Hæstaréttar í heild sinni má lesa hér.

Sjónvarpsfrétt Stöðvar 2 er dómur féll í héraði fyrir tæpu ári má sjá eftir 30 sekúndur í myndbandinu að neðan.