Móðir fjölfatlaðs manns segir ástandið lífshættulegt

Óánægja með ferðaþjónustu fatlaðra eftir að Strætó hf. tók við akstrinum er gríðarleg. Fjölmörg óhöpp hafa orðið og öryggið lítið sem ekkert. Hildur Sólveig Sigurðardóttir, móðir fjölfatlaðs manns, er ósátt með störf réttindagæslumanns fatlaðra í Reykjavík, og segir hann ekki beita sér í málinu sem skyldi. 

Líf í húfi

„Mér finnst svo sjálfsagt að réttindagæslumenn beiti sér í þessu máli. Málið er grafalvarlegt þar sem það er verið að stefna öryggi fatlaðra stórlega í hættu,“ segir Hildur Sólveig.

Vísir greindi frá því á dögunum að fjölmörg óhöpp hafi orðið að undanförnu, fatlaðir hafa oltið úr hjólastólum og heilabilaðir sjúklingar hafa týnst. Þá eru dæmi um að fatlaðir séu látnir rúnta um bæinn tímunum saman og hefur það orðið til þess að dagskrá þeirra hefur farið úr skorðum.

Alþingi samþykkti hinn 11.júní 2011 lög um réttindagæslumenn fyrir fatlað fólk og hefur síðan þá verið einn réttargæslumaður í hverju sveitarfélagi. Frá áramótum hafa þrír verið á höfuðborgarsvæðinu í tveimur og hálfu stöðugildi. Velferðarráðherra fer með yfirstjórn réttindagæslu.

Í lögunum segir meðal annars að skylt sé að tilkynna til réttindagæslumanns ef ástæða er til að ætla að brotið sé á rétti einstaklings, og þá á hann þá að veita hinum fatlaða einstaklingi nauðsynlegan stuðning og kanna fyrir hann málið. Að sögn Hildar Sólveigar var lítið um svör þegar hún hafði samband við réttindargæslumann á dögunum.

Málið þolir ekki bið

„Ég hringdi í réttindagæslumann og spurði hvað þeir væru að gera í þessu máli og hann sagði mér að þeir væru lítið að gera. Ég spurði hvort aðgerðaráætlun væri í gangi og hann sagði að svo væri ekki, hann ætlaði að bíða og sjá til. Hann virðist ekki gera sér grein fyrir því hversu mörg líf eru í hættu,“ segir Hildur. „Málið þolir enga bið. Það ættu allir að vita.“

Sonur Hildar heitir Sigurður Örn, er 27 ára og fjölfatlaður. Hann er bundinn við hjólastól og getur ekki tjáð sig. Hildur óttast það versta verði ekki fundin lausn hið snarasta.

Ástandið fari batnandi 

Magnús Þorgrímsson, sem starfað hefur sem réttindagæslumaður frá árinu 2012, segir að unnið sé í málinu daglega. Aðgerðarhópur á vegum velferðarsviðs fundi alla daga og fullyrðir að ástandið muni batna næstu daga.

„Það er auðvitað verið að bregðast alltof seint við. Upplýsingar um þarfir fólks virðast ekki hafa verið að skila sér til þeirra sem aka. En þetta á að batna með hverjum deginum og það er talað um að það verði strax eftir helgi. Hvort ástandið verði gott, veit ég þó ekki,“ segir Magnús. Hann segir að strax í byrjun hafi hópurinn skilað inn tillögum til úrbóta, en að Strætó hafi ekki brugðist við þeim öllum. Þessir hlutir séu þó ekki í verkahring réttindagæslumanna. Þeirra hlutverk sé að koma áleiðis ábendingum og að það sé reglulega gert.

„Við sem réttindagæslumenn breytum þannig séð engu. Við erum ekki partur af kerfinu. Eina sem við getum gert er að reyna að hafa áhrif á þjónustuna og að þau standi sig í stykkinu. Við höfum samband við Reykjavíkurborg og Strætó. Ástandið er grafalvarlegt og við vonumst til að geta haft áhrif á þessi málefni sem allra fyrst,“ segir hann.