Skilur gagnrýni á ráðninguna en telur hana innan lagarammans

„Meginreglan er auðvitað sú að það á að auglýsa störf hjá ríkinu en hér er um tímabundna ráðningu að ræða, ekki fastráðningu,“ segir Ari Matthíasson, þjóðleikhússtjóri, aðspurður um hvers vegna staða dramatúrgs við leikhúsið var ekki auglýst.

Símon Birgisson var fyrir helgi ráðinn í stöðuna til eins árs og bendir Ari í þessu samhengi á að Símon hefur verið sýningardramatúrg við nokkrar sýningar leikhússins seinustu ár, þar á meðal Engla alheimsins, Konuna við 1000° og Sjálfstætt fólk.

En mun Ari auglýsa stöðu dramatúrgs að ráðningartíma Símons loknum?

„Þegar og ef tekin verður ákvörðun um að ráða ótímabundið í þetta starf þá mun það að sjálfsögðu verða auglýst. Ég skil þá gagnrýni sem fram hefur komið á þessa ráðningu og er mjög meðvitaður um þau lög og þær reglur sem gilda um opinber störf. Þar sem þetta er þó tímabundin ráðning og varðar tiltekin listræn verkefni þá tel ég að hún sé innan ramma laganna,“ segir Ari og bætir við að stundum sé ekki alltaf hægt að auglýsa laus störf í listaheiminum:

„Segjum sem svo að það vanti einhvern til að leika Hamlet. Leikstjórinn vill einn mann og hann er óumdeilt frábær listamaður, fremstur meðal jafningja. Á þá að auglýsa það starf? „Þjóðleikhúsið óskar eftir leikara til að leika Hamlet.“ Það er ekki alltaf hægt að gera í listum.“