Segir heilbrigðisráðherra hafa læðst með veggjum

„Samningar við lækna hafa loksins náðst. Biðlistar hafa lengst verulega, jafnvel svo hundruðum sjúklinga skiptir í sumum tilvikum, þar sem bráðveiku fólki bráðliggur þó á að komast undir lækna hendur,“ segir Össur Skarphéðinsson, þingmaður Samfylkingarinnar, í stöðufærslu á Facebook.

Samningar náðust í deilu lækna við íslenska ríkið í nótt. Með samningnum er verkfallsaðgerðum lækna, sem staðið hafa síðan 27. október, lokið.

Össur segir að Kristján Þór Júlíusson, heilbrigðisráðherrann, hafi með lævi og snilld tekist að læðast með veggjum, reynt að láta lítið á sér bera og tekist að vísa allri ábyrgð á aðra en hann sjálfan.

„Kristján Þór ber eigi að síður ábyrgð á þessari stöðu. Læknaverkfallið var á hans vakt. Biðlistarnir eru á hans faglegu ábyrgð. Ætli hann að komast frá málinu með einhverjum sóma verður hann í samkomulagi við lækna, að setja upp aðgerðaáætlun n um það að vinna niður biðlistana, og koma þeim frá á sem allra skemmstum tíma. Annað er ekki í boði fyrir heilbrigðisráðherrann.“

Þingmaðurinn segir að eyðing verkfallsbiðlistanna kosti fjármagn.

„Kristján Þór þarf að ganga í að tryggja þá eigi síðar en nú þegar. Verkfallið dróst svo lengi sem raun ber vitni vegna sleifarlags stjórnvalda. Á meðan var almenningur óttasleginn. Hundruður manna sem verða að komast til rannsókna eða í aðgerðir eru enn uggandi, og þann kvíða þarf Kristján Þór að fjarlægja með því að tryggja fjármagn strax til að kosta eyðingu biðlistanna sem aðgerðarleysi stjórnvalda skapaði,“ segir Össur en liggi ekki slík áætlun fyrir þegar þing kemur saman mun hann leggja fram þingsályktunartillögu um átak til að útrýma biðlistum strax í byrjun þings, og krefjast flýtimeðferðar á á Alþingi.