Fjölnismenn missa einn sinn besta mann | Ivanovski á heimleið

Fjölnismenn, spútniklið Pepsi-deildar karla í sumar, hefur orðið fyrir áfalli því liðið þarf að sjá á eftir einum sínum besta leikmanni í sumar.

Miðvörðurinn Daniel Ivanovski er á heimleið vegna persónulegra ástæðna og mun ekki spila meira með Grafarvogsliðinu á leiktíðinni.  Ivanovski er 31 árs gamall og kemur frá Makedóníu. Hann spilaði í Svíþjóð áður en hann kom í Grafarvoginn.

Ágúst Þór Gylfason, þjálfari Fjölnis, staðfesti þessar fréttir við Vísi í dag en þetta mál er nýkomið upp.

„Það eru fjölskylduaðstæður sem valda því að hann vildi bara fara heim. Við stoppum það ekki því maður vill ekki hafa menn í liðinu sem eru ekki alveg hundrað prósent," sagði Ágúst.

Fjölnir er í 3. sæti í deildinni eftir 3-0 sigur á Leikni í 8. umferðinni á mánudaginn en liðið hafði áður unnið 3-1 útisigur á Íslandsmeisturum Stjörnunnar. Fjölnir fékk 9 stig af 9 mögulegum og fékk aðeins eitt mark á sig í síðustu þremur leikjum liðsins með Daniel Ivanovski innanborðs.

„Þetta er frábær leikmaður bæði innan sem utan vallar. Þetta er mjög vont fyrir okkur og það reynir dálítið á okkur núna. Nú þurfum við að sýna samstöðu og það þurfa bara aðrir að taka við keflinu," sagði Ágúst sem þarf nú að setja saman nýtt miðvarðarpar.

„Hann spilaði sem bakvörður í fyrstu þremur leikjunum og þá voru það Atli (Már Þorbergsson) og Beggi (Bergsveinn Ólafsson) sem voru hafsentar. Við hljótum að leysa þetta. Grafarvogurinn er stór og margir á samningum þannig að við eigum menn í allar stöður," sagði Ágúst.

Daniel Ivanovski hefur verið einn besti leikmaður Pepsi-deildarinnar og hann og fyrirliðinn Bergsveinn Ólafsson hafa náð mjög vel saman í miðri vörninni.

Fjölnisliðið hefur aðeins fengið á sig 7 mörk í fyrstu 8 leikjum sínum í Pepsi-deildinni í sumar þar af aðeins 1 mark í fimm heimaleikjum þar sem liðið hefur þegar haldið marki sínu hreinu í fjórum leikjum.

„Við höldum áfram ótrauðir áfram. Við vissum að svona kemur upp þótt að við vissum ekki að þetta nákvæmlega kæmi upp. Menn fara hinsvegar í bönn og meiðast. Það er því mikilvægt að vera með samstilltan hóp og halda áfram," sagði Ágúst en Fjölnir mun leita sér að nýjum leikmanni.

„Opnunartíminn er handan við hornið en það er samt mánuður í hann. Við erum samt strax farnir að leita, bæði hér heima og erlendis. Þetta gerðist samt bara um miðjan dag í gær og við vissum ekkert af þessu fyrr," sagði Ágúst.

„Hann gerði allt vel í sumar sem hann tók sér fyrir hendur. Þetta er mikill atvinnumaður. Við erum mjög sáttir við hans framlag og hefðum viljað hafa það út tímabilið," sagði Ágúst.