Vonarstjarna Fylkis á leið til Groningen

Kolbeinn Birgir Finnsson, 16 ára leikmaður Fylkis, mun að öllum líkindum ganga til liðs við hollenska liðið Groningen um áramótin.

Þetta staðfesti Magnús Agnar Magnússon, umboðsmaður hjá Total Football, í samtali við Fótbolta.net í dag.

Kolbeinn hefur komið við sögu í sjö leikjum Fylkis í Pepsi-deildinni í sumar en hann er yngsti leikmaður sem hefur spilað fyrir Árbæjarliðið í sögu félagsins.

Þá hefur Kolbeinn leikið 11 leiki með U-17 ára landsliðinu.

Kolbeinn er sonur Finns Kolbeinssonar, fyrrverandi leikmanns Fylkis sem var valinn besti leikmaður Íslandsmótsins árið 2002.