Þrír leikir í úrvalsdeildinni en valinn í enska landsliðið | Hver er þessi Dele Alli?

Dele Alli, 19 ára gamall leikmaður Tottenham í ensku úrvalsdeildinni, var annar tveggja nýliða í landsliðshópi Englands sem Roy Hodgson tilkynnti í dag.

England er nú þegar búið að tryggja sér sæti á EM 2016 líkt og strákarnir okkar í íslenska landsliðinu, en þeir ensku eiga fyrir höndum leiki gegn Eistlandi og Litháen.

En hver er þessi Dele Alli sem er kominn í enska landsliðið eftir að spila aðeins fjóra leiki í ensku úrvalsdeildinni?

Deli Alli heitir fullu nafni Bamidele Jermaine Alli. Hann fæddist 11. apríl 1996 í Milton Keynes á Englandi og gekk í raðir Milton Keynes Dons árið 2007 þegar hann var ellefu ára gamall.

Hann spilaði sinn fyrsta meistaraflokksleik fyrir MK Dons sextán ára gamall í nóvember 2012 þegar hann kom inn á sem varamaður í bikarleik. Fyrsta snerting hans með boltann var hælsending.

Fyrsta markið fyrir MK Dons skoraði hann ellefu dögum síðar í bikarnum þegar Dons vann Cambridge í endurteknum bikarleik, 6-1. Það var jafnframt hans fyrsti byrjunarliðsleikur.

Alli komst í byrjunarliðið hjá MK Dons fyrir tímabilið 2013/2014 og skoraði þá sex mörk í 33 leikjum í C-deildinni. Lið í úrvalsdeildinni voru farin að skoða Alli sem ákvað þó að taka slaginn aftur með Dons á síðustu leiktíð.

Fyrsta mark Dele Alli fyrir Tottenham gegn Leicester:

MK Dons tók 3,5 milljóna punda tilboði Liverpool í strákinn sumarið 2014, en Alli, sem hefur alla tíð verið stuðningsmaður Liverpool og mikill aðdáandi Steven Gerrard, vildi ekki fara frá sínu félagi.

„Ég vildi spila fyrir MK aðeins lengur og fá fleiri leiki í byrjunarliðinu. Ég vissi að með aðeins meiri reynslu væri ég tilbúinn til að fara,“ sagði Alli í viðtali við Four Four Two.

Biðin borgaði sig því Alli vakti enn meiri áhuga hjá stóru liðunum þegar hann átti stórleik gegn Manchester United í deildabikarnum á síðustu leiktíð. MK Dons vann leikinn, 4-0.

MK Dons gat ekki haldið í strákinn lengur og keypti Tottenham Alli fyrir fimm milljónir punda í janúar á þessu ári. Sú upphæð á eftir að vera hærri þegar árangurstengdar greiðslur fara að skila sér til Dons.

Alli var aftur á móti lánaður strax aftur til MK Dons og kláraði hann tímabilið með uppeldisfélaginu. Alli skoraði 16 mörk og gaf níu stoðsendingar og hjálpaði Dons upp í B-deildina. Hann var svo kjörinn efnilegasti leikmaður neðri deildanna á Englandi eftir síðasta tímabil.

„Ég get ekki logið, þetta verður erfitt og mikil áskorun. En ég trúi því að ég sé tilbúinn. Að mínu mati fer ég til Tottenham til að spila og ég mun leggja mikið á mig til að komast í byrjunarliðið,“ sagði Alli áður en hann hóf undirbúningstímabilið á White Hart Lane.

Hann hefur svo sannarlega gert alla réttu hlutina síðan hann kom til Tottenham. Alli spilaði sinn fyrsta leik í úrvalsdeildinni 8. ágúst þegar hann kom inn á sem varamaður gegn Manchester United og skoraði sitt fyrsta mark gegn Leicester 22. ágúst í 1-1 jafntefli.

Alli er í heildina búinn að spila þrjá leiki í úrvalsdeildinni fyrir Tottenham og skora eitt mark, en hann á einnig að baki leiki fyrir öll yngri landslið Englands.

Margir eru á því að framtíðin sé björt á enska landsliðinu með unga leikmenn á borð við Harry Kane, Alex Oxlade-Chamberlain, Luke Shaw og Ross Barkley. Dele Alli virðist vera enn eitt ungstirnið.