Sagðist hafa verið allsber og drukkinn í lauginni með krökkum í tíunda bekk

Vilhelm Anton Jónsson tilkynnti móður sinni í dag að hann hefði farið í Vesturbæjarlaugina eftir lokun á dögunum og myndir af honum nöktum að syngja væru að fara birtast í fjölmiðlum.

Símtalið var partur af dagskráarlið sem þeir félagarnir í FM95BLÖ kalla „Óþægilega símtalið“ 

Mamma hans brást ekki vel við þessum fréttum en Vilhelm sagði einnig að hann hafi verið þar með krökkum í tíunda bekk: „Varstu þú fremstur í flokki með einhverjum krökkum í tíunda bekk? Villi minn þú verður að gæta þín.“

Hún reyndi að brýna fyrir Villa að hann ætti alls ekki að taka þátt í svona löguðu.

„Þú verður að passa þig þegar þú ert drukkinn og hætta þessu helvíti. Þetta getur kostað þig mikið. Guð hjálpi þér Vilhelm,“ sagði mamman sem var heldur betur sátt þegar í ljós kom að um hrekk væri að ræða.