Sjötíu hjúkrunarfræðingar útskrifast frá HÍ: Bera svartar slaufur

Þeir sjötíu hjúkrunarfræðingar sem útskrifast frá Háskóla Íslands í dag munu bera svartar slaufur í tilefni dagsins. Þeir gera það til að „sýna stuðning og sem virðingarvott fyrir þeirri depurð og togstreitu sem margir hjúkrunarfræðingar upplifa í sinni kjarabaráttu [....]“, eins og segir í yfirlýsingu sem útskriftarnemarnir hafa sent frá sér.

Þeir segja daginn markast af baráttunni sem hjúkrunarfræðingar þurfa nú að há „við forneskjulegar hugmyndir um að réttlætanlegt sé að laun „kvennastétta“ séu lægri en annarra stétta með sambærilegt nám að baki.“

Svarta slaufan er jafnfram tákn endaloka:

„Endaloka þess tíma sem konur sætta sig við kynbundinn launamun og mismunun. Okkur finnst viðeigandi á 100 ára afmæli kosningaréttar kvenna á Íslandi að bjóða íslenskum stjórnvöldum að stíga þetta mikilvæga skref inn í framtíðina með okkur, það er kominn tími til.“

Yfirlýsingu útskriftarnema í hjúkrunarfræði má sjá í heild sinni hér að neðan:

Í dag, 20. júní 2015 erum við 70 nemar sem útskrifumst sem hjúkrunarfræðingar frá Háskóla Íslands eftir fjögurra ára nám sem hefur hefur verið krefjandi og gefandi í senn. Námið okkar veitir okkur starfsréttindi í heilbrigðisstétt sem myndar ásamt öðrum grunnstoðir heilbrigðiskerfisins, en flestir eru sammála um að góð þjónusta þess leikur lykilhlutverk í velferðarsamfélagi.

Dagurinn í dag einkennist af stolti og gleði yfir því að hafa staðið undir þeim væntingum sem gerðar eru til þeirra sem vilja fá að kalla sig hjúkrunarfræðing á Íslandi. Þakklæti er okkur einnig í huga, fyrir að búa í landi þar sem við höfum færi á að hljóta háskólamenntun sem gefur okkur byr undir báða vængi. Möguleikarnir að námi loknu eru fjölbreyttir og spennandi og veitir okkur farveg fyrir hæfileika okkar og áhuga sem liggja bæði í klínískri færni og fræðimennsku á okkar sviði. Við gerum okkur jafnframt grein fyrir því að námið okkar kostar samfélagið mikið, það er dýrt að mennta hvern hjúkrunarfræðing. Við vonumst þess vegna flest til þess að Íslendingar njóti starfskrafta okkar, að við sjáum okkur fjárhagslega fært að starfa í þágu almennings á Íslandi.

Þessi dagur markast þó óneitanlega af þeirri baráttu sem hjúkrunarfræðingar þurfa að há við forneskjulegar hugmyndir um að réttlætanlegt sé að laun „kvennastétta“ séu lægri en annarra stétta með sambærilegt nám að baki. Til að sýna stuðning og sem virðingarvott fyrir þeirri depurð og togstreitu sem margir hjúkrunarfræðingar upplifa í sinni kjarabaráttu, berum við í dag svarta slaufu.

Slaufan er þó ekki síður tákn endaloka, endaloka þess tíma sem konur sætta sig við kynjabundin launamun og mismunun. Okkur finnst viðeigandi á 100 ára afmæli kosningaréttar kvenna á Íslandi að bjóða íslenskum stjórnvöldum að stíga þetta mikilvæga skref inn í framtíðina með okkur, það er kominn tími til.