Ógnað og áreitt kynferðislega á Secret Solstice: „Er skrýtið að maður sé hræddur við ykkur?“

Bylgja Babýlons, leikkona og uppistandari, beindi orðum sínum til karlmanna og stráka í Facebook-færslu sem hún skrifaði í gærkvöldi. Þar greinir hún frá kynferðislegri áreitni sem hún varð fyrir í gær á tónlistarhátíðinni Secret Solstice.

„Mig langar hrikalega að biðja þig um að ímynda þér að manneskja, höfðinu, jafnvel tveimur höfðum hærri en þú og með töluvert meiri líkamsmassa myndi vaða upp að þér, rífa í þig og draga þig ofan í andlitið á sér og arga „komdu bara með okkur“ á meðan 5 aðrar manneskjur af sömu risa stærð standa hjá og hlæja.“

Í færslunni segist Bylgja hafa hitt þennan strákahóp á leiðinni á klósettið en tilgreinir tvö önnur tilvik þar sem tveir aðrir karlmenn áreittu hana kynferðislega. Hún var samtals í tvær klukkustundir á hátíðinni.

Ekki eðlilegt því náungarnir eru „bara fullir“

„Ég ákvað að setja þetta á Facebook vegna þess að það hefur verið mjög góð bylting í gangi í sambandi við kynferðisofbeldi. Ég spyr mig af hverju við eigum að vera að standa í henni en láta okkur síðan hafa það að vera áreittar kynferðislega eða líkamlega ógnað á almannafæri, þar sem það er „eðlilegt“ því náungarnir eru „bara fullir,““ segir Bylgja í samtali við Vísi.

Í færslunni á Facebook segir Bylgja að hún sé stór stelpa og geti farið ein á klósettið; hún þurfi ekki alltaf að vera með „crewið“ sitt með sér:

„En þá virðist það gerast að ég tilheyri ekki neinni hjörð lengur og verð bara svona ráfandi antílópa sem er auðvelt skotmark.

Ekki misskilja mig, vegna þess að ég er stór stelpa munu engin ör sitja á sálu minni eftir þetta kvöld, en ég er þreytt, pirruð og reið.

Ég veit að það eru ekki allir karlmenn slefandi hjarðdýr og viðbjóðir sem bera enga virðingu fyrir neinu sem er með píku og brjóst. En þetta eru vinir ykkar, kunningjar, synir og frændur.

Er skrýtið að maður sé hræddur við ykkur? Er það tilgangurinn kannski?“

„Okkur vantar karla til að kenna körlum að þetta sé fáránleg hegðun“

Bylgja segist beina orðum sínum til karlmanna til að uppræta við það sem hún kallar „samfélagsmein“ og vísar þá til þess að kynferðisleg áreitni á djamminu sé álitin „eðlileg.“

„Við þurfum heilsteyptu strákana sem gera þetta ekki með okkur í lið. Við getum hunsað þessa hegðun eða slegist við mennina sem gera okkur þetta. Það er bara spurning um „fight or flight“ en okkur vantar karla til að kenna körlum að þetta sé fáránleg hegðun. Okkur vantar gaurinn sem segir við vin sinn „Ertu þroskaheftur? Hættu þessu!“ í mómentinu þegar þetta á sér stað,“ segir Bylgja.

Hún endar svo færslu sína á þessum orðum:

„Góðar stundir og fokkið ykkur þið þarna ógeð sem vitið hver þið eruð.“

Þessi status er ætlaður köllum, mönnum og strákum. Hæ. Mig langar hrikalega að biðja þig um að ímynda þér að...

Posted by Bylgja Babýlons on Friday, 19 June 2015