Hlutverk háskóla að skapa umhverfi sem laðar fram ögrandi spurningar

Kristín Ingólfsdóttir flutti í dag síðustu brautskráningarræðu sína við Háskóla Íslands. Hún hefur verið rektor skólans síðustu 10 ár en lætur af störfum í lok næsta mánaðar. Kristín kvaddi í dag 2081 kandídat frá öllum fræðasviðum skólans en aldrei hafa fleiri útskrifast frá Háskóla Íslands. og í upphafi ræðunnar ræddi fráfarandi rektor um hlutverk háskóla í samfélaginu:

„Hlutverk háskóla er að skapa umhverfi sem laðar fram ögrandi spurningar, hvetur til þróunar nýrra hugmynda og þenur út mörk þekkingarinnar. Umfram allt eiga háskólar að næra forvitni.“

Þá lagði Kristín sérstaka áherslu á mikilvægi nýsköpunar í starfi skólans og fagnaði því að Vísindagarðar Háskóla Íslands væru orðnir segull fyrir nýsköpunarfyrirtæki og frumkvöðlastarfsemi.

Rektor vakti einnig sérstaka athygli á samvinnu ólíkra fræðigreina í rannsóknum og nýsköpun. Benti Kristín á að þetta væri þróun sem nú ætti sér stað alls staðar í heiminum við úrlausn verkefna sem snerta til dæmis heilsufarsógnir, loftslagsbreytingar og fæðuöryggi.