Fyrrverandi starfsmaður MP banka dæmdur í fangelsi fyrir tugmilljóna fjárdrátt

Héraðsdómur Reykjaness dæmdi í gær Guðlaugu Sigríði Arnórsdóttur, fyrrverandi starfsmann MP banka, í tveggja ára fangelsi fyrir tugmilljóna króna fjárdrátt á tímabilinu 13. desember 2012 til 18. febrúar 2015. Tuttugu og tveir mánuðir refsingarinnar eru skilorðsbundnir og hún þarf því að sitja inni í tvo mánuði. Auk þessa var konunni gert að greiða MP banka rúmar 60 milljónir króna með vöxtum.

Konan var ákærð fyrir að hafa dregið sér um 60 milljónir króna en hún millifærði tæpar 50 milljónir á bankareikninga móður sinnar í 110 færslum.

Millifærði á reikninga Íbúðalánasjóðs og Landsbankans

Þá millifærði hún rúmar 5 milljónir á reikning Íbúðalánasjóðs „til uppgreiðslu og til greiðslu á eftirstöðvum áfallinga gjalddaga og kostnaðar, veðskuldabréfs nr. [...], sem upphaflega var útgefið af hálfu ákærðu til Frjálsa fjárfestingarbankans [...],“ eins og segir í dómi héraðsdóms.

Auk þessa millifærði konan um 5,5 milljónir króna á reikning Landsbankans, einnig vegna uppgreiðslu og greiðslu á eftirstöðvum áfallinna gjalddaga og veðskuldabréfs.

Konan játaði brot sitt skýlaust fyrir dómi en hún hefur ekki áður gerst sek um refsiverða háttsemi. Var litið til þess við ákvörðun refsingar að hún játaði auk þess sem hún hefur greitt til baka rúma hálfa milljón króna. Til refsiþyngingar komi hins vegar hversu stórfellt brot hennar sé en það náði yfir 26 mánaða tímabil.

Tekur tillit til aðstæðna konunnar

Fyrir dómi var lagt fram læknisvottorð vegna veikinda konunnar og tekur dómurinn tillit til aðstæðna konunnar og veikinda hennar. Þó er tekið fram að þetta réttlæti ekki háttsemi hennar. Verjandi konunnar vísaði meðal annars til dóms Hæstaréttar frá árinu 2011 þegar kona var dæmd í tveggja ára fangelsi fyrir fjárdrátt en 22 mánuðir refsingarinnar voru þá skilorðsbundnir. Var það að hluta til vegna sérstakra aðstæðna konunnar.

Héraðsdómur dregur ekki í efa nú að aðstæður konunnar sem starfaði hjá MP banka séu erfiðar „en að virtu öllu því sem að framan greinir, en með hliðsjón af því hversu stórfellt brot ákærðu var og á hve löngum tíma það var framið þykir ekki unnt að skilorðsbinda refsingu ákærðu að öllu leyti, heldur skal fresta fullnustu 22 mánaða refsingarinnar og skal sá hluti hennar falla niður að liðnum þremur árum frá uppkvaðningu dóms þessa, haldi ákærða almennt skilorð 57. gr. almennra hegningarlaga nr. 19/1940, sbr. 4. gr. laga nr. 22/1955.“