Ætla að þjóðfélagið verði af einum milljarði á hverjum degi

Ætla má að þjóðfélagið verði af einum milljarði króna, fyrir hvern dag sem vinnustöðvun íslenskra atvinnuflugmanna stendur yfir og stærsta ferðasumar sögunnar er í hættu, að mati Samtaka atvinnulífsins. Þá er ekki tekið tillit til alvarlegra langtímaafleiðinga sem af kunna að hljótast.

Verkfallsaðgerðir Félags íslenskra atvinnuflugmanna gegn Icelandair munu hafa áhrif á um 600 flug og 100 þúsund farþega félagsins þá níu daga sem tímabundin vinnustöðvun nær til á tímabilinu 9. maí til 3. júní. „Hver dagur veldur stórtjóni hvort sem litið er til flugfélagsins, ferðaþjónustunnar, útflutningsfyrirtækja eða orðspors landsins almennt,“ segir á vefsíðu SA.

Á þessu tímabili sé hlutdeild Icelandair í flugi til og frá landinu 70 prósent auk þess sem flug til Bandaríkjanna muni nánast leggjast af. Röskun á samgöngum til og frá landinu verði mjög mikil.

Samningar liggi fyrir hjá 98 prósent starfsfólks á almennum vinnumarkaði en þeir sem eftir eru taki einkum til flugstéttanna. Meirihluti starfsmanna Icelandair Group hefur þegar samið um laun í takti við almennu samningana en kröfur flugmanna séu úr öllum takti við þá.

Ósættanlegt að lítill hópur raski stórkostlega samgöngum 

Markmiðið sé að koma á stöðugu verðlagi á Íslandi og auka kaupmátt fólks til lengri tíma. Það verði hins vegar ekki gert með því að hækka launakostnað fyrirtækja um tugi prósenta og tilheyrandi verðbólgu.

Ósættanlegt sé að lítill hópur geti raskað stórkostlega lífsnauðsynlegum samgöngum við Ísland með miklum efnahagslegum skaða. Því sé mikilvægt að samkomulag náist í deilunni sem fyrst svo Íslendingar geti flogið til og frá landinu samkvæmt áætlunum. Og vaxandi ferðaþjónusta jafnframt tekið á móti erlendum ferðamönnum sem vilja kynna sér land og þjóð.