Gerir myndbönd fyrir New York ballettinn

„Ég er rosalega ánægð með þetta, það er eiginlega algjör draumur að vera kominn hingað,“ segir Rebekka Bryndís Björnsdóttir, framleiðandi og tónlistarkona en hún vinnur nú í New York balletinum við að framleiða myndbönd.

„Ég framleiði öll myndbönd fyrir balletinn svo sem heimildarmyndir, kynningarmyndbönd, stiklur, auglýsingar og lítil vídeó sem þau setja á síðuna,“ segir Rebekka sem flutti til New York fyrir einu og hálfu ári. Þegar þetta er ritað hefur hún starfað í tvær vikur fyrir balletinn og tekið upp ýmis myndbönd af dönsurum fyrir fjölmiðla og heimasíðu balletsins. „Maður er bara að komast inn í ferlið og kynnast öllum,“ segir Rebekka.

Rebekka segist hæstánægð með það að vinna á hinu fræga Lincoln-torgi, þar sem ballettinn, óperan og sinfoníuhljómsveit borgarinnar starfa. „Það er rosalega gaman að fara þangað á hverjum degi og vera í þessu umhverfi. Ég hef alltaf haft áhuga á dansi þannig að það er rosalega skemmtilegt að vera í kringum ballet á hverjum degi og geta horft á heimsklassadansara. Þetta er mjög inspirerandi umhverfi.“

Rebekka hefur haft nóg á sinni könnu undanfarið en hún hefur einnig verið að framleiða tónlistarmyndbönd fyrir ýmsa heimsfræga tónlistarmenn svo sem M83, Washed Out og Liars en myndbandið fyrir lagið Amor Fati með Washed Out var skotið hér á Íslandi. Rebekka hefur unnið þessi myndbönd með kærasta hennar Yoonha Park, sem er leikstjóri.

Þá hefur hún unnið meirihluta þessa árs við kvikmyndina The Nest sem framleidd er af grínustunum Tinu Fey og Amy Poehler. Hún fjallar um tvær frábitnar systur sem halda húskveðjupartí á heimili þeirra, sem foreldrarnir ætla að selja. Myndin er nú í eftirvinnslu og kemur út seint á næsta ári.

Rebekka hefur verið í pásu frá hljómsveitinni Hjaltalín þar sem hún spilaði á fagott. „Það er búið að vera svo ótrúlega mikið að gera að maður er ekkert mikið að vinna í tónlist, fyrir utan nokkur „jam sessions“ með fólki sem ég hef kynnst hérna.

Annars er ég hæstánægð með að vera flutt hingað og að hafa reynt á þetta.“