Saga um að taka ábyrgð á eigin líkama

„Þetta byrjaði þannig að okkur langaði að segja sögu sem fjallar um að fara í gegnum gelgjuskeiðið, það að þroskast líkamlega og að þurfa allt í einu að taka ábyrgð á sínum líkama og að hafa ekki fulla stjórn yfir honum,“ segir Lovísa Lára Halldórsdóttir. Hún ásamt Margréti Buhl og Nönnu Höjgaard Grettisdóttur útskrifaðist úr Kvikmyndaskóla Íslands í vor.

Þær eru höfundar og framleiðendur stuttmyndarinnar Smástirnis sem valin var til sýninga á kvikmyndahátíðinni Northern Wave á Grundarfirði dagana 17. til 19. september. Lovísa segir það mikinn heiður fyrir þær að myndin þeirra hafi verið valin „Okkur finnst þetta mjög spennandi hátíð og vorum búnar að plana að fara hvort sem við kæmumst inn eða ekki þannig að það var bara plús að komast inn.“

Þær vildu segja sögu sem þessa frá sjónarhorni kvenna, en að þeirra mati er umfjöllun um slík mál ábótavant og mættu fleiri konur vera virkar í kvikmyndagerð því þær eiga margar sögur ósagðar. „Þó engin okkar hafi gengið í gegnum nákvæmlega það sem aðalpersónan gengur í gegnum í myndinni, þá samsömuðum við okkur allar karakternum á ákveðinn hátt og þekktum þá tilfinningu að ganga í gegnum þessar breytingar og vera skíthræddar við það sem er að gerast og ekki þora að tala við neinn um það,“ bætir Lovísa við.

Myndin hlaut viðurkenningu sem besta myndin, bæði í handrits- og framleiðsludeild, hjá Kvikmyndaskólanum í vor.

Í dag reka þær saman kvikmyndaframleiðslufyrirtækið Anthems of Our Youth og eru með ýmislegt í pípunum. „Við erum að gera mynd fyrir vinkonu okkar, Söndru Helgadóttur leikkonu, sem heitir Litla hetjan og erum við þá að halda áfram að velta fyrir okkur mannlegu eðli og hræðilegum hlutum sem fólk gerir, líkt og í Smástirni“, bætir Lovísa við. „Svo er margt fleira skemmtilegt í vinnslu.“