Miklu minna skorað á gervigrasi

Þrjár umferðir eru að baki í Pepsi-deild karla og helmingur leikjanna átján hefur farið fram á gervigrasvöllum.

Þetta er vissulega mjög óvenjulegt ástand og skemmtanagildið er ekki eins mikið ef marka má tölfræðina. Það er nefnilega athyglisvert að mun færri mörk eru skoruð í gervigrasleikjunum en í þeim leikjum sem hafa verið spilaðir á náttúrulegu grasi.

Leikmenn hafa skorað 26 mörk í níu grasleikjum, eða 2,9 að meðaltali í leik, en mörkin hafa aðeins verið 15 í gervigrasleikjunum níu, sem gerir bara 1,7 mörk að meðaltali.

Þarna munar ellefu mörkum í jafnmörgum leikjum og þar með meira en einu marki að meðaltali í leik. Í fimm leikjum hefur verið skorað undir tveimur mörkum og þeir hafa allir farið fram á gervigrasi, þar á meðal eina markalausa jafnteflið til þessa í sumar.

Þriðja umferðin var ekki að hjálpa gervigrasinu í þessari tölfræðiúttekt enda voru aðeins skoruð samtals tvö mörk í þremur gervigrasleikjum í gær og annað þeirra kom úr vítaspyrnu.

Það voru skoruð fimmtán færri mörk í fyrstu þremur umferðunum í ár en í fyrra og leikmenn deildarinnar eru búnir að setja nýtt met í markaleysi í fyrstu þremur umferðunum í tólf liða deild.

Það hafa öll lið nema eitt spilað á gervigrasi í þessum þremur fyrstu umferðunum en aðeins nýliðar Fjölnis hafa fengið alla leiki á grasi. KR og Fram hafa á móti spilað alla þrjá leiki sína á gervigrasi, þar af Framliðið alla leikina á gervigrasinu í Laugardal.

Eins og staðan er núna fer enginn leikur fram á grasi í næstu umferð um næstu helgi en það gæti breyst snögglega eins og í aðdraganda síðustu umferða í Pepsi-deildinni.



Gras

9 leikir, 810 mínútur

26 mörk (2,89 í leik)

Mark á 31 mínútu fresti

Gervigras

9 leikir, 810 mínútur

15 mörk (1,67 í leik)

Mark á 54 mínútna fresti