Innlent

Verkföll næsta mánuðinn geta raskað ferðum þúsunda

Jóhanna Margrét Einarsdóttir skrifar
Fari fram sem horfir verða miklar raskanir á flugi Icelandair á næstunni, með tilheyrandi óþægindum fyrir þúsundir farþega.



Flugmenn eru í ótímabundnu yfirvinnubanni og flugfreyjur hafa boðað yfirvinnubann frá og með næsta sunnudegi semjist ekki við þær. Yfirvinnubann þessara hópa getur valdið því að fella verði niður flug með skömmum fyrirvara og falli eitt flug niður getur það haft keðjuverkandi áhrif.



Einstaklingar og fyrirtæki í ferðaþjónustu eru orðin verulega áhyggjufull vegna verkfallsaðgerða flugmanna. Jafnframt veldur áhyggjum að samningar eru lausir við fleiri hópa.



Flugfreyjur hjá Icelandair hafa boðað tímabundið verkfall 27. maí, sólarhringsverkfall er boðað 6. júní og annað 14. júní. Ótímabundið verkfall hefst 19. júní.



Atvinnurekendur hafa boðið flugfreyjum 2,8 prósenta launahækkun en því hafa þær hafnað.

Þá er ósamið við flugvirkja sem vinna hjá Icelandair. Kjaradeilu þeirra hefur verið vísað til ríkissáttasemjara. Flugvirkjar hafa ekki boðað til aðgerða.



Helga Árnadóttir, framkvæmdastjóri Samtaka ferðaþjónustunnar, segir stöðuna grafalvarlega. Hún segir að aðgerðir flugmanna hafi þegar valdið miklu tjóni.



Margir hafi afbókað á hótelum. Þá hafi veitingastaðir, rútufyrirtæki og bílaleigur tapað viðskiptum.



?Stærsti hluti tekna í ferðaþjónustu kemur inn í maí, júní, júlí og ágúst. Hver dagur skiptir því miklu,? segir Helga og bætir við að hætta sé á að orðspor landsins bíði hnekki og það geti haft í för með sér tekjutap í framtíðinni.



Stjórn Bílgreinasambandsins hefur miklar áhyggjur af afleiðingum verkfalls flugmanna Icelandair. Bílaleigur hafi pantað hátt í 4.000 bíla fyrir sumarið auk þess sem verkfallið hafi áhrif á hópferðafyrirtæki.



Bílgreinasambandið segir að verkfalli megi líkja við náttúruhamfarir eins og eldgos, þar sem mikil óvissa er um framgang og hversu lengi hamfarirnar vara. Þá endurskoði ferðamenn áætlanir sínar.



Margra klukkustunda sáttafundur var í kjaradeilu flugmanna í gær og stóð hann fram á kvöld. Mikið ber enn í milli í deilunni.

Tengd skjöl




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.