Þyrlan komin í skýli í Keflavík

Þyrla Norðurflugs, sem hlekktist á í lendingu á Eyjafjallajökli, hefur verið flutt í skýli á Keflavíkurflugvelli.

Notuð var þyrla Landhelgisgæslunnar til að hífa hana upp á mánudaginn en slysið átti sér stað á fimmtudaginn í síðustu viku. Slæmt veður kom í veg fyrir að hún var flutt fyrr í burtu. Að sögn Ragnars Guðmundssonar hjá rannsóknarnefnd samgönguslysa tók um hálfan sólarhring að koma vélinni til Keflavíkur frá því þyrla Landhelgisgæslunnar lagði af stað í aðgerðina frá Reykjavík um hádegisbilið.

Samkvæmt heimildum fréttastofu rákust spaðar þyrlunnar í jökulinn á fullri ferð, þegar þyrlan valt á hliðina. Þeir eru því brotnir eða beygðir, skrokkur vélarinnar dældaður og rúður brotnar. Ragnar getur ekki sagt til um hvort þyrlan sé ónýt. „Það kemur tryggingamaður seinna í vikunni. Það er ekki tímabært að segja til um það en hún er mjög illa farin.“ Frumrannsókn lýkur eftir nokkrar vikur og þá ætti að koma í ljós nákvæmlega hvað olli slysinu. Flugmaður og þrír kvikmyndatökumenn voru um borð í þyrlunni vegna kvikmyndaverkefnis en þeir slösuðust ekki.

Birgir Haraldsson, framkvæmdastjóri Norðurflugs, segir kvikmyndaverkefni öðruvísi en farþegaflug. „Allt sem við gerum er samkvæmt handbókum. Einn kafli af mjög mörgum segir okkur hvernig við eigum að haga okkur í þessum tilteknu verkefnum,“ segir Birgir.