Jón Gnarr keypti álf í borgarstjórastærð

Hin árlega álfasala SÁÁ hefst í dag og stendur yfir til 11. maí. Álfurinn fagnar 25 ára afmæli í ár en sala hans er stærsta og mikilvægasta fjáröflun samtakanna.

„Fólk tekur alltaf vel í þetta,“ segir Rúnar Freyr Gíslason, leikari og samskiptastjóri SÁÁ. „SÁÁ á sér stað í hjörtum fólks.“

Í ár rennur allur söluhagnaður til uppbyggingar á meðferð fyrir unga fíkla og af því tilefni seldu ungir sölumenn SÁÁ Jóni Gnarr borgarstjóra fyrsta álfinn í gær.

„Hann fékk svona álf í borgarstjórastærð,“ segir Rúnar. „Hann sagði að ef álfurinn væri svona gætu allir séð hverjir keyptu og hverjir ekki.“