Nýr skáli á Glerárdal dreginn með snjótroðara

Nýi skálinn er 44 fermetrar að stærð. Ferðalagið með hann inn dalinn tók nokkurn tíma. „Það voru boltuð saman tvö og tvö vegrið og þannig mynduð skíði og skálinn dreginn með troðara alla leið í tvennu lagi; forstofan sér og skálinn sér.“ Mikill snjór er enn inni á Glerárdal og þurfti að moka ofan af undirstöðum sem byggðar voru í fyrra fyrir nýja skálann. 

„Í maí í fyrra fórum við með gröfu og gerðum undirstöður undir skálann og gerðum allt klárt. Því þurfti bara að moka niður á undirstöðurnar og setja skálann niður,“ segir Hilmar sem var staddur í Lamba við að leggja lokahönd á skálann.

Hilmar vill meina að þetta sé bylting fyrir starf félagsins. „Nú komast sextán manns fyrir í gistingu en sennilega er ekki of þröngt fyrir tuttugu manns ef út í það er farið. Nú er aðstaðan orðin allt önnur og betri inni á Glerárdal. Þetta er bara bylting, það er ekki hægt að hafa önnur orð um það.“

Gönguleiðin frá Súluvegi við gömlu öskuhaugana við Glerárdal er um 11 km. Mikið sjálfboðastarf hefur verið unnið í félaginu til að koma þessari aðstöðu fyrir. Að mati Hilmars er sjálfboðavinnan við skálann komin í um 1.200 tíma.