Sýndargirðing gæti haldið síld frá Kolgrafafirði

„Það má ekki láta tímann líða og hlaupa svo í þetta mánuði áður en síldin gengur inn,“ segir Gísli Karel Halldórsson, byggingarverkfræðingur hjá Verkís, sem bent hefur á að nota megi hljóðbylgjur eða ljós til að fæla síld frá Kolgrafafirði.

Áætlað er að síld að verðmæti sjö milljarðar króna hafi drepist í Kolgrafafirði í desember 2012 og í febrúar 2013. Verkís gerði skýrslu um málefnið fyrir umhverfisráðuneytið í fyrra en var synjað um styrk frá Vegagerðinni til að skoða málið frekar. Sú lausn sem fyrirtækið leggur til að verði reynd er sýndargirðing nokkru neðan við brúna sem smíðuð var yfir fjörðinn. Hægt væri að kveikja á girðingunni eftir þörfum í gegn um farsíma.

Eru ekki ný vísindi

„Fiskigöngum er stundum stjórnað með rafmagni en niðurstaðan var að það sé ekki heppilegt þarna út af saltinu í sjónum. Svo er hægt að gera þetta með ljósi og hljóðbylgjum. Þá er sýndargirðingin eins og gerviveggur fyrir neðan brú,“ útskýrir Gísli sem undirstrikar að ekki sé öruggt að sýndargirðing leysi vandann. „Okkar tillaga var að setja upp búnað og prófa hvort þetta hafi áhrif.“

Að sögn Gísla er Verkís í sambandi við breskan sérfræðing sem þróað hefur slíkar sýndargirðingar sem settar hafi verið upp erlendis. Þetta séu ekki ný vísindi. „Hann er til í að koma til landsins og rannsaka þetta og vinna með okkur,“ segir Gísli.

Kostnaður brot af tjóninu

Aðspurður segir Gísli könnun eins og þá sem Verkís leggi til myndu leiða í ljós hvort sýndargirðing gæti dugað ein og sér til að halda síldinni frá Kolgrafafirði eða hvort grípa þurfi til miklu kostnaðarsamari lausna. Girðingin sé alls ekki dýr miðað við aðrar aðferðir sem menn velti fyrir sér.

„Og þetta er ekki dýrt miðað við þann skaða sem þetta er að valda, bæði með dauða á verðmætum fiski og svo umhverfisspjöllum sem því fylgir. Við erum að tala um miklu lægri upphæðir, kannski nokkra tugi milljóna, segir Gísli, sem er sjálfur fæddur og uppalinn í Grundarfirði og sendi á dögunum bæjaryfirvöldum þar erindi til að benda á þennan möguleika og ýta við málinu.

Bæjarstjórnin segir mikilvægt að stjórnvöld hraði vinnslu málsins þannig að það fáist langtímalausn vegna mögulegs síldardauða í Kolgrafafirði.