Neyðast til að flytja þvert yfir landið

Justyna Gronek og eiginmaður hennar starfa bæði hjá Vísi hf. á Húsavík. Þau eiga eina dóttur saman sem er rúmlega tveggja ára gömul og er í leikskólanum á Húsavík.

Fjölskyldan keypti íbúð í janúar á þessu ári en það var áður en þau fengu fréttirnar um að loka ætti starfsstöð Vísis í bænum. Þau reyna nú að finna leigjendur til að taka við íbúðinni.

„Við höfum verið á Húsavík í fimm ár. Þetta voru hræðilegar fréttir en við viljum hugsa um þetta sem ævintýri. Við viljum ekki vera leið heldur reyna að hugsa jákvætt um þetta,“ segir Justyna. 

Útgerðarfyrirtækið Vísir hf. hefur gert samning við fyrirtækið Fiskeldi Austurlands um að 25 starfsmenn Vísis á Djúpavogi fái störf þar í bæ við slátrun, vinnslu og pökkun á eldislaxi. Aðrir 25 starfsmenn fyrirtækisins hyggjast flytja til Grindavíkur og vinna hjá Vísi hf. þar. 

Samanlagt hafa sjötíu starfsmenn Vísis hf. á Húsavík og Djúpavogi sagst vera tilbúnir að flytja búferlum til Grindavíkur þegar fiskvinnslu í plássunum verður hætt. Samkvæmt upplýsingum Fréttablaðsins eru margir starfsmanna fyrirtækisins einhleypir og af erlendu bergi brotnir.

Nú þegar er hafinn undirbúningur fyrir komu fólksins til Grindavíkur en mörgum fylgja fjölskyldur. „Við gerum ráð fyrir að koma öllum fyrir,“ segir Pétur Hafsteinn Pálsson, framkvæmdastjóri Vísis hf. „Verktakar eru að græja íbúðir sem stóðu tómar svo þær verði ásættanlegar fyrir þá sem eru að leigja.“

Bergur Elías Ágústsson, bæjarstjóri Húsavíkur, er uggandi yfir þeim fjörutíu starfsmönnum Vísis hf. og fjölskyldum þeirra sem hyggjast flytja úr bænum. „Þetta er afskaplega slæmt fyrir samfélagið og fólk er miður sín,“ segir Bergur, „Þetta var allt gott fólk og þeirra verður saknað.“

Starfsmönnum Vísis hf. á Húsavík var greint frá stöðu mála í gær. Engum starfsmönnum fyrirtækisins verður sagt upp um mánaðamótin en árlegt vinnslustopp fer þó í gang vegna hráefnisskorts. 

Starfsmenn Vísis hf. á Húsavík sem ekki vildu láta nafns síns getið voru ósammála um stöðuna sem nú er uppi. Annar var ánægður með að fá vinnu í Grindavík en hinn ósáttur við ákvörðun fyrirtækisins um lokun.