Músíktilrauna-plakötin 10 ára

Frá árinu 2004 hafa skemmtileg plaköt einkennt hátíðina en á þeim er að finna tónlistarmenn sem tengjast tilraununum. „Þetta hefur aldrei verið nein sérstök persóna en fólk segist alltaf sjá þekkt andlit út úr henni. Í hári persónunnar eru meðlimir hljómsveitarinnar sem var sigurvegari síðasta árs en þetta minnir alltaf á eitthvað,“ segir Þorvaldur Gröndal, verkefnastjóri Músíktilrauna 2014, en þessa dagana fara hinar geysivinsælu Músíktilraunir fram í Hörpu en þær fóru fyrst fram árið 1982 og þá í Tónabæ.

Plakötin eru hönnuð af Gunnari Þór Arnarsyni sem er hönnunarstjóri hjá auglýsingastofunni Hvíta húsinu. „Fyrirmyndin er aldrei nein ákveðin manneskja, þó að Björk og fleiri frægir séu í höfðinu á fyrsta plakatinu, en við byrjuðum að taka vinningsbandið í höfuðið á öðru árinu,“ bætir Ása Hauksdóttir, framkvæmdastjóra Hins hússins. Á hverju ári kemur nýtt plakat sem inniheldur nýjan haus, nýjan lit og nýtt letur. „Það skiptist á að vera strákahaus og stelpuhaus á plakatinu, sem sýnir að bæði kynin eiga jafn mikið senuna. Við erum að reyna að brjóta upp staðalímyndir,“ segir Ása.

Flestir sem hafa séð plakötin, hvort sem er í blöðum, strætóskýlum eða annars staðar, sjá yfirleitt þekkta persónu út úr andlitunum en það er þó ekki þannig.

„Þetta hefur gengið rosalega vel og mætingin hefur verið mjög góð,“ segir Þorvaldur um tilraunirnar í ár. „Saxófónninn er að koma sterkur inn í ár, það eru nokkur atriði sem hafa nýtt sér saxófóninn en annars er þetta frekar klassískt mynstur, harðkjarni, rokk, rapp, popp og flestar tónlistarstefnur sem koma fram í ár,“ segir Þorvaldur og bætir við: „Það er talsvert um rafsveitir sem blanda saman óhefðbundnum hljóðfærum.“

Átta hljómsveitir fara beint í úrslitin af undankvöldunum en svo má dómnefndin velja allt að fjórar aðrar hljómsveitir til að senda í úrslitin.

Að taka þátt í Músíktilraunum er frábær upplifun og ómetanleg reynsla fyrir upprennandi og skapandi tónlistarfólk.

Margar þekktar hljómsveitir hafa komið fram á Músíktilraunum eins og til dæmis Of Monsters and Men, Botnleðja, XXX Rottweiler hundar, Mammút, Agent Fresco, Stuðkompaníið og Maus svo nokkrar séu nefndar.