Mögnuð Fantasíuförðun

Svanhvít Valgeirsdóttir kom í heimsókn frá Brussel og kenndi fantasíuförðun í Fashion Academy.

„Það var skemmtilegt að koma aðeins heim og fá að setja penslana á húð í staðinn fyrir striga,“ segir Svanhvít Valgeirsdóttir þegar hún er spurð út í sýnikennsluna í fantasíuförðun sem hún hélt í förðunardeild Fashion Academy. Svanhvít býr í Brussel með þýskum eiginmanni sínum en kom til Íslands vegna tilnefningar sinnar til Edduverðlauna fyrir leikgervi Ávaxtakörfunnar.

Svanhvít hefur sérhæft sig í leikgervum og listförðun og hefur komið víða við á ferli sínum. Hún hefur meðal annars farðað í Óperunni, Þjóðleikhúsinu og starfaði sem skólastjóri Snyrtiakademíunnar um skeið áður en hún flutti til Brussel.

Þegar hún er spurð út í vinnuna á bak við fantasíuförðunina, segir hún: „Ég var í þrjá klukkutíma að gera þessa fantasíuförðun með hárinu því ég var jú að sýna og kenna í leiðinni en annars væri ég í kringum klukkustund að gera svona.“